SQO-da qoldanylǵan plastık bótelkelerdi óńdeıtin zaýyt iske qosyldy
PETROPAVL. QazAqparat - «Indýstrııalandyrýdyń ekinshi besjyldyǵy: Qazaqstanda jasalǵan» atty jalpyulttyq telekópir barysynda Petropavlda elimizde balamasy joq zaýyt iske qosyldy, dep habarlaıdy QazAqparat tilshisi.
Elbasy Nursultan Nazarbaevtyń qatysýymen ótken jalpyulttyq telekópir barysynda Qazaqstannyń 28 kásiporny saltanatty túrde jumysyn bastady. Olardyń barlyǵy Indýstrııalandyrý kartasynyń ekinshi besjyldyǵyna engen jobalar. Solardyń biri - metallplastık ónimderin shyǵaratyn «Radýga» seriktestigi.
Saltanatty túrde jumysyn bastaǵan kásiporyn turmysqa qajetti plastık buıymdaryn jasaıdy. Zaýyttyń bir ereksheligi, bul jerde buryn qoldanylǵan plastık bótelkeler, paketter men basqa da qoqys qaıta óńdelip granýlaǵa aınaldyrylady. Osylaısha kásiporyn jylyna 4 myń tonna qaldyqty óńdemekshi. Keıin plastık granýlalar shıkizat retinde óndiriste qaıta paıdaǵa jaratylady. ıAǵnı, bul - kúndelikti turmysqa qajetti plastık buıymdaryn jasaýdyń tolyq tsıkldi jobasy. Joba quny 894 mln teńge. Kásiporyn osylaısha oblystaǵy ekologııalyq jaǵdaıdy jaqsartyp, «jasyl ekonomıkaǵa» óz úlesin qosýda.
«Biz buǵan deıin shetelden alyp kelgen taýarlardy ózimizde jasap, shyǵarýymyz kerek. Bul jaıynda Elbasy bıylǵy Joldaýynda da aıtty. Qarapaıym zattardyń ekonomıkasy degenimiz osy. Shara, shelek, basqa da plastmassa zattar - bular kúndelikti turmysta qajet. Baǵasy da qoljetimdi jáne básekege qabiletti. Sapasy da sheteldik ónimderden kem emes. Biz bul jumysty bolashaqta da jalǵastyramyz, josparlarymyz bar», - deıdi oblys ákimi Qumar Aqsaqalov.
Zaýyt jylyna 1680 tonna ónim shyǵarýǵa qaýqarly. Onyń 80 paıyzy Petropavl men Qazaqstannyń ózge qalalarynda saýdalansa, 20 paıyzy eksportqa negizdelgen.
«Indýstrııalandyrý kartasynyń ekinshi besjyldyǵy aıasynda 2015-2019 jyldar aralyǵynda Soltústik Qazaqstan oblysynda jalpy sommasy 900 mlrd teńgeni quraıtyn 44 jobany júzege asyrý josparlanǵan. Kartaǵa engen jobalar memleket tarapynan jeńildetilgen nesıeler alyp, shyǵyndaryn sýbsıdııalap, taǵy basqa jeńildikterge ıe bolady. Esesine turǵyndardy turaqty jumyspen qamtyp, ekonomıkaǵa oń áserin tıgizedi»,-deıdi SQO ındýstrıaldy-ınnovatsııalyq damý basqarmasynyń jetekshisi Arman Orazǵulov.
Jalpy, 2015-2017 jyldar aralyǵynda SQO 16,3 mlrd teńgeniń 27 jobasy júzege asty. Nátıjesinde, 2,5 myń jumys orny qurylmaq.
