SQO-da qoldan jasalǵan dıagnostıkalyq kartalar tabyldy
PETROPAVL. QazAqparat - SQO aýmaǵynda qoldan jasalǵan dıagnostıkalyq kartalar tabyldy. Oblystyq kóliktik baqylaý ınspektsııasy mamandary júrgizgen reıd barysynda esh jerde tirkelmegen 3 karta tárkilendi, dep habarlaıdy QazAqparat tilshisi.
SQO Kásipkerler palatasynda avtokólikti tehnıkalyq baıqaýdan ótkizý máselelerine qatysty jıyn ótti. Oǵan memlekettik jáne quqyq qorǵaý organdarynyń, oblystyq aqparattyq tehnologııalar ortalyǵynyń ókilderi jáne tehnıkalyq baıqaý operatorlarynyń jetekshileri men ókilderi qatysty.
Kásipkerler palatasy baspasóz qyzmetiniń málimetinshe, SQO-da qazirgi ýaqytta tehnıkalyq baıqaý qyzmetin 33 operator kórsetedi. Jartysyna jýyǵy Petropavl qalasynda jumys isteıdi. Jalpy, 44 jeli bolsa, sonyń 7-eýi - mobıldi.
«Byltyr 109 myńnan astam avtokólik mindetti tehnıkalyq baıqaýdan ótýi tıis bolsa, sonyń 93 myńǵa jýyǵy tekseristen ótti. Barlyq tekserilgen kólikterdiń 15,3% talaptarǵa saı bolmaı, baıqaýdan óte almady»,- deıdi SQO kólikti baqylaý ınspektsııasy basshysynyń orynbasary Andreı Markov.
2018 jyly kásipkerler tarapynan da 1,5 myńǵa jýyq buzýshylyq anyqtalǵan. Kóp jaǵdaıda olar tehnıkalyq baıqaýdan ótkeni týraly málimetti aqparattyq júıege engizgende qate jiberedi eken. Kólikti baqylaý ınspektsııasy mamandarynyń aıtýynsha, byltyr tehnıkalyq baıqaý operatorlaryna 14 tekseris: 8-i jospardan tys, 6 ishinara júrgizilgen. Nátıjesinde zań talaptaryn saqtamaýdyń 10 deregi anyqtaldy. Olar: dıagnostıkalyq kartalardyń berilmeýi, tehnıkalyq baıqaý ótkizý barysynda túsirilgen beınefaılderdiń saqtalmaýy jáne ortalyq qyzmetkerleri biliktiliginiń sáıkessizdigi.
Qazirgi ýaqytta oblys jáne respýblıkalyq mańyzy bar joldarda qoldan jasalǵan dıagnostıkalyq kartalardy anyqtaý maqsatynda reıdter júrip jatyr. Jyl basynan osyndaı 3 karta tabylǵan. Olar «Tehosmotr» biryńǵaı aqparattyq júıede tirkelmegen eken.
