SQO-da qolaısyz otbasylarǵa baqylaý kúsheıtildi
ASTANA. KAZINFORM — Soltústik Qazaqstanda qańtardan beri quqyq qorǵaý organdarynyń qatysýymen komıssııada 164 otbasynyń jaǵdaıy qaraldy, dep habarlaıdy Polisia.kz.
Osy jolǵy tekseris basynda komıssııa tamyz aıynan beri esepte turǵan bes balaly ata-ananyń úıine bardy. Ókinishke qaraı ata-ana mas ekeni anyqtaldy. balalar ájesiniń úıine jetkizildi. Jaǵdaı qaıtalana berse, ata-analyq quqyqtan aıyrý máselesi qaralady.
— 44 jastaǵy ata-analar bes balany tárbıelep otyr, olardyń úsheýi — 6, 12 jáne 15 jasta — birge turady. Otbasy tamyz aıynan beri esepte tur. Josparly tekseris aıasynda ıývenaldy polıtsııa qyzmetkerleri men qalalyq ákimdik janyndaǵy kámeletke tolmaǵandardyń isi jáne olardyń quqyqtaryn qorǵaý jónindegi komıssııa músheleri úıge bardy. Ata-analar taǵy da mas kúıinde anyqtaldy. Balalardyń qaýipsizdigin qamtamasyz etý úshin olar ýaqytsha ájesine jetkizildi. Polıtsııa kámeletke tolmaǵandardy tárbıeleý jónindegi mindetterdi oryndamaý deregi boıynsha ákimshilik materıal jınaqtap jatyr. Materıal komıssııanyń qaraýyna joldanyp, onda ata-analyq quqyqtan aıyrý máselesi qaralady, — dep túsindirdi oblystyq PD baspasóz qyzmeti.
Vedomstvo atap ótkendeı, bala qaýipsizdigi — «Zań men Tártip» tujyrymdamasynyń mańyzdy baǵyttarynyń biri. ıÝvenaldy polıtsııa reıdteri apta saıyn, al kámeletke tolmaǵandar isi jónindegi komıssııamen birlesken tekserister aı saıyn ótkiziledi. Osy kúnderi «Genderlik zorlyq-zombylyqqa qarsy 16 kún belsendi áreket» respýblıkalyq aktsııasy jáne «Ýchaske» jedel-profılaktıkalyq is-sharasy aıasynda profılaktıkalyq jumys kúsheıtilgen. Tekserý barysynda balalardyń turmys jaǵdaıy, ata-analardyń tárbıeleý jáne qaýipsizdigin qamtamasyz etý jónindegi mindetterdi qalaı oryndap jatqany baǵalanady.
— Qańtardan beri quqyq qorǵaý organdarynyń qatysýymen komıssııada 164 otbasynyń jaǵdaıy qaraldy. Bul ótken jylmen salystyrǵanda 27-ge kóp. Polıtsııa qyzmetkerleri bul jumystyń negizgi maqsaty — balalardy qorǵaý jáne olardyń arasyndaǵy quqyqbuzýshylyqtardyń aldyn alý ekenin atap ótti. Qolaısyz otbasylarǵa jan-jaqty qoldaý usynylady. Psıhıkalyq densaýlyq ortalyǵynda em alý múmkindigi, ataýly áleýmettik kómek jáne basqa da járdem túrleri. Ata-analyq quqyqtan aıyrý — balanyń ómiri men densaýlyǵyna qaýip tóngen erekshe jaǵdaılarda ǵana qoldanylatyn shara. Kóp jaǵdaıda mundaı jaǵdaılar ata-analardyń ishimdikke salynýymen baılanysty. Ár ata-ana óz quqyqtaryn qalpyna keltirýge quqyly. Bıyl bes qolaısyz otbasy túzelip, qaıta qaýyshty, — delingen habarlamada.
Budan buryn Pavlodarda balalardyń zańsyz áreketi úshin ata-analar jaýapqa tartylǵanyn jazǵanbyz.