SQO-da kókjótelmen syrqattaný tórt ese tómendedi

PETROPAVL. KAZINFORM — Soltústik Qazaqstan oblysynda byltyr óte juqpaly dert — kókjótelmen 29 adam aýyrdy. Bıyl bir adamǵa ǵana osy dıagnoz qoıyldy.

SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, 2024 jyly kókjótelmen aýyrýdyń 120 deregi tirkelgen.

Kókjótel byltyr oblystyń 7 aýdanynda anyqtaldy. Syrqattanǵandardyń 72% nemese 21 jaǵdaı Petropavlǵa tıesili. Al, Qyzyljar jáne Aıyrtaý aýdandarynda 2 adamnan, Jambyl, Aqqaıyń, Esil jáne Maǵjan Jumabaev aýdandarynda 1 adamnan juqtyrǵan. Barlyq jaǵdaı 14 jasqa deıingi balalar arasynda tirkelgen.

— Syrqattanǵandardyń 93% ekpe almaǵan balalar. Olardyń ata-analary vaktsınatsııadan bas tartqan. Kókjótelden qorǵanýdyń jalǵyz tıimdi joly — vaktsınatsııa. Alǵashqy ekpe balaǵa 2 aıynda qoıylady. Ol dıfterııadan, sirespeden, polıomıelıtten, V gepatıtinen jáne B tıpti gemofıldi ınfektsııadan qorǵaıtyn aralas vaktsına egiledi. Keıin 1 aı aralyǵymen eki ekpe jáne 18 aılyq jasta, odan keıin 6 jasta jalǵastyrylady. Vaktsınatsııany tirkelgen emhanadan tegin alýǵa bolady, — deıdi departament basshysynyń orynbasary Arman Kúshbasov.

Mamannyń aıtýynsha, kókjótel — aýyz qýysynda, murynda jáne kómeıde bolatyn, Bordetella pertussis bakterııasy týdyratyn óte juqpaly tynys alý joldarynyń aýrýy. Basty belgisi — uzaqqa sozylǵan, túnde kúsheıetin jótel.

— Eki jasqa deıingi balalar men qart adamdarda asqynýlar jıi bolady. Degenmen kez kelgen jasta aýrý ál-aýqatty aıtarlyqtaı nasharlatýy múmkin. Kókjóteldiń belgileri joǵarǵy tynys joldarynyń bakterıaldy ınfektsııasyna uqsas. Dene qaltyrap, +38° deıin ystyǵy kóteriledi. Álsizdik, bulshyqetterdegi «aýyrsyný», bas aýrýy bolady. Murynnan sý aǵyp, biteledi, qurǵaq jótel, shyryshty qabyqtyń isinýi baıqalady. Aýyrýdyń 10–14 kúninde jótel kúsheıe túsip, qoıý qaqyryq bólinedi nemese qusady. Túnde jótelden bet kógeredi, moıyn tamyrlary isinedi, — deıdi Arman Kúshbasov.

Qozdyrǵyshy ınfektsııa juqtyrǵan adammen tyǵyz baılanysta bolǵan kezde aýa-tamshy jolymen beriledi. Naýqas adam 30 kún boıy ınfektsııany taratýǵa qabiletti.

Sondaı-aq, mamannyń aıtýynsha, dert ádettegi jótelge qarsy dári-dármekpen emdelmeıdi. 

Buǵan deıin Qyzylordada kókjótel 34,8 ese azaıǵanyn jazǵan edik.