SQO-da kókjótelmen aýyrý shamamen alty ese tómendedi
PETROPAVL. KAZINFORM — Soltústik Qazaqstan oblysynda jyl basynan beri kókjóteldiń zerthanalyq jolmen rastalǵan tórt jaǵdaıy tirkeldi.
SQO Sanıtarııalyq-epıdemıologııalyq baqylaý departamentiniń málimetinshe, ótken jyldyń segiz aıynda óńirde 23 bala aýyrǵan.
Olardyń barlyǵy jasqa tolmaǵan.
— Aýrýshańdyq ótken jylmen salystyrǵanda aıtarlyqtaı tómendegenimen, qaýip áli de bar. Sebebi bıyl kókjótelge shaldyqqandardyń barlyǵy — bir jasqa deıingi, vaktsına almaǵan balalar. Aýrýdyń barlyq jaǵdaıy qańtar, aqpan jáne naýryz aılarynda tirkeldi, — deıdi departamenttiń ınfektsııalyq jáne parazıttik aýrýlardy epıdemıologııalyq baqylaý bóliminiń bas mamany Gúlıda Djakeeva.
Mamannyń aıtýynsha, kókjótel alǵashynda qarapaıym sýyq tııýge uqsaıdy. Murynnan sý aǵady, dene qyzýy kóterilýi múmkin, jeńil jótel paıda bolady. Sondyqtan aýrýdyń alǵashqy kezeńinde ony birden taný ońaı emes. Alaıda ýaqyt óte kele jótel kúsheıip, ustamaly sıpatqa aýysady. Ásirese ómiriniń alǵashqy aılaryndaǵy balalarda bul ınfektsııa aýyr ótýi múmkin.
— Kókjótel — aýa arqyly taraıtyn bakterııalyq ınfektsııa. Naýqas adam jótelgende, túshkirgende nemese sóıleskende qozdyrǵysh aınalaǵa taralady. Vaktsına almaǵan adamnyń ınfektsııa juqtyrý qaýpi joǵary.
Aýrýdyń eń qaýipti tusy — asqynýy. Kókjótel pnevmonııaǵa, al aýyr jaǵdaıda mı zaqymdanýyna deıin alyp kelýi múmkin. Sondyqtan balada uzaqqa sozylǵan nemese ustamaly jótel baıqalsa, ózdiginen emdeýge tyryspaı, dárigerge júgingen jón, — deıdi Gúlıda Djakeeva.
Kókjótelden qorǵanýdyń negizgi joly — vaktsınatsııa. Balalarǵa kókjótelge qarsy ekpe ómiriniń alǵashqy aılarynan bastap júrgiziledi.
Vaktsınatsııa 2, 3, 4 jáne 18 aıynda, keıin 6 jasynda jasalady.
Mamandar ata-analarǵa ekpe kúntizbesin saqtaýdyń mańyzyn eskertedi. Sebebi ómiriniń alǵashqy aılarynda náreste ınfektsııaǵa óte osal keledi.
Kókjóteldiń aldyn alýda qarapaıym saqtyq sharalary da mańyzdy. Bólmeni jıi jeldetip, ylǵaldy tazalyq júrgizý qajet. Jótelgende aýyzdy jabý, qoldy únemi jýý — ınfektsııanyń taralýyn tejeıdi.
Osyǵan deıin Shyǵys Qazaqstanda kókjótelmen aýyrǵandar sany 2 ese artqanyn jazǵan edik.
