SQO-da kókjótelden em alǵan balalardyń sany bes ese artqan

PETROPAVL. KAZINFORM – Soltústik Qazaqstan oblysynda kókjótelmen aýyrǵan balalar sany eselep artqan. Dertti juqtyrǵan balalardyń eshqaısy ekpe almaǵan. 

SQO Densaýlyq saqtaý basqarmasy baspasóz qyzmeti Kazinform tilshisiniń saýalyna bergen jaýabynda sońǵy jeti aıda oblystyq kópbeıindi balalar aýrýhanasynyń ınfektsııalyq bóliminde 51 balanyń em alyp shyqqanyn aıtty. Byltyr osy aralyqta 10 balaǵa «kókjótel» dıagnozy qoıylǵan.

«Nárestelerde, ásirese 6 aıǵa deıingi balada kókjótel aýrýy kezinde kókjótel entsefalopatııasy damıdy, bul - mıdyń ózgeriske ushyraýy. Sondaı-aq ókpesine zaqym keledi, dıafragmasy jarylyp, arty aýyr pnevmonııaǵa aparady. Bolashaqta aýrýdan keıin sozylmaly bronhıt, konvýlsııalyq ustamalar, psıhosomatıka jáne nevrozdar paıda bolýy múmkin», - deıdi vedomstvonyń baspasóz hatshysy Gúlnar Saılaýqyzy. 

Mamannyń aıtýynsha, kókjóteldiń aldyn alýdyń negizgi jáne jalǵyz joly - ınfektsııaǵa qarsy vaktsınatsııadan ótý. 

SQO sanıtarııalyq-epıdemıologııalyq baqylaý departamentiniń málimetinshe, naýqastardyń negizgi úlesi - bir jasqa deıingi balalar. 

Ulttyq vaktsınatsııa kúntizbesine sáıkes, kókjótelge qarsy vaktsınatsııa nárestege 2, 3 jáne 4 aıynda úsh ret jasalady. Revaktsınatsııa negizgi ımmýnıtetti saqtaý úshin 18 aıda qoıylady. Ári qaraı, 6 jasynda vaktsınanyń qosymsha dozasy engiziledi.

Buǵan deıin SQO-da bıyl 3,8 myń jasóspirim qyzǵa adam papıllomasy vırýsyna qarsy ekpe salynatynyn jazǵan edik.