SQO-da kóktemniń erte kelýimen turǵyndardy kene shaǵa bastady

PETROPAVL. KAZINFORM – Soltústik Qazaqstan oblysynda bir apta ishinde kene shaqqan 11 adam dárigerlerge qaraldy. 

Kúnniń jylynýymen kene oıanyp, adamdar zardap shege bastady.

SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, kene túrli juqpaly aýrýlardyń kózi. Sonyń ishindegi eń qaýiptisi — kene entsefalıti. Budan bólek kene súzegi, kene borrelıozy, Kongo-Qyrym gemorragııalyq qyzbasy sııaqty qaýipti aýrýlardyń tasymaldaýshysy bolyp, allergııalyq reaktsııalar týdyratynyn este ustaǵan jón. Ádette jumysy orman sharýashylyǵymen, kene entsefalıtiniń tabıǵı oshaqtarynda bolýmen baılanysty adamdar profılaktıkalyq ımmýndaýdan ótedi.

Kene entsefalıtiniń profılaktıkasy maqsatynda jándikter shaǵyp alǵan jaǵdaıda kene ımmýnoglobýlıni qoldanylady. Preparatty dáriger medıtsınalyq uıymǵa júgingen kezde tekserýden keıin ǵana taǵaıyndaıdy.

— Kene shaǵyp alǵan jaǵdaıda eń durysy dereý dárigerge medıtsınalyq kómekke júginý kerek. Birinshiden, keneni tolyǵymen óz betinshe alý múmkin emes. Keneniń basy julynyp, jaranyń ishinde qalýy múmkin. Ekinshiden, jándikterdiń ýy denege teri arqyly da enýi múmkin. Em-sharany júrgizýshige juqtyrý qaýpi bar. Úshinshiden, eger siz keneni ózińiz alyp tastasańyz onyń juqtyrǵyshtyǵyn bilý múmkin bolmaıdy jáne ony tekserý úshin mamanǵa barý kerek, — deıdi SQO sanıtarııalyq-epıdemıologııalyq baqylaý departamenti basshysynyń m. a. Arman Kúshbasov.

Eger kene shaǵyp alǵannan keıin dene temperatýrasynyń joǵarylaýy, aýyrsyný, qatty bas aýrýy baıqalsa, dereý dárigerge qaralǵan jón.

— Jándikterden saqtaný úshin tabıǵat aıasyna shyqqan kezde repellentterdi qoldaný qajet. Kenege qarsy quraldar shaǵý qaýpin azaıtady. Qorǵanýdy umytpańyz, ol úshin jeńi uzyn jabyq kıim jáne qonyshy uzyn aıaq kıim kıińiz. ⁠Ózińizdi jáne jaqyndaryńyzdy únemi qarap-tekserip otyryńyz. Tabıǵatta serýendep kelgennen keıin deneni kenelerdiń bar-joǵyna muqııat tekserińiz. Al kene shaqqan jaǵdaıda ýaqtyly medıtsınalyq kómekke júginińiz. ⁠Immýnoglobýlınniń tıimdiligin qamtamasyz etý úshin shaqqannan keıingi alǵashqy 4 kúnde medıtsınalyq uıymǵa habarlasý qajet, — deıdi Arman Kúshbasov.

Byltyr SQO-da kene shaǵýdyń 653 jaǵdaıy tirkelgen eken.

Buǵan deıin SQO-da eki aı ishinde 160-qa jýyq adam janýarlardan zardap shekkenin jazdyq.