SQO-da kóktemgi sý tasqynynyń qaýpi mol
PETROPAVL. QazAqparat – Soltústik Qazaqstan oblysynda bıyl qalyptan tys jyly jáne qys qarly boldy, dep habarlaıdy QazAqparat tilshisi.
«Qazgıdromet» RMK SQOF málimetinshe, mamandar óńirdegi 19 gıdrologııalyq beketten monıtorıng júrgizedi. Jaqynda olar kóktemgi sý tasqyny boıynsha memlekettik organdar men ákimdikterge aldyn ala konsýltatıvtik gıdrologııalyq boljamdy jasap berdi.
Bıyl SQO-da qar molynan jaýdy. Qazirgi ýaqytta sınoptıkter aýdandardaǵy qardyń qalyńdyǵyn ólshep, taldaý jasap jatyr. Ásirese Ǵ.Músirepov, Aıyrtaý aýdandarynda jaǵdaı kúrdeli, munda kóp mólsher tirkelgen. Ótken aımen salystyrǵanda qardyń qalyńdyǵy 1,5 esege artsa, bul ótken jylǵy kórsetkishten 4 ese kóp.
«Bıyl qardyń kóptiginen SQO, ShQO, Qaraǵandy, Aqmola jáne Qostanaı oblystarynda sý tasıdy dep kútilýde. Qazir óńirdegi Sergeev sý qoımasynda 660 mln tekshe metr sý bar, ıaǵnı 95 % tolǵan. Bul 2017 jylǵy kórsetkishke teń», - deıdi «Qazgıdromet» RMK SQOF dırektory Qymbat Merǵalımova.
Bıyl qystyń qalyptan tys jyly bolýyna baılanysty birneshe ózende sýdaǵy muz qozǵala bastaǵan. Esil ózenindegi muzdyń qalyńdyǵy qazir 15-30 sm aralyǵynda ǵana. Bul byltyrǵydan shamamen 3 ese az.
«Naýryz aıynyń ortasha temperatýrasy mınýs 6-8 aralyǵynda bolady dep kútilýde. Bul ádettegi normadan 1 gradýsqa joǵary. Aıdyń basynda qar jaýsa, orta shenine qaraı qardyń arty jańbyrǵa ulasady. Naýryzdyń ekinshi on kúndiginde aýa temperatýrasy aıtarlyqtaı jylyp, qar qarqyndy túrde erı bastaıdy», - deıdi Qymbat Merǵalımova.
