SQO-da kóktemgi sý tasqynyna qarsy sharalar: 8 top quryldy
PETROPAVL. QazAqparat – Soltústik Qazaqstan oblysy qoǵamdyq keńesiniń otyrysynda óńirdiń kóktemgi sý tasqynyna ázirligi pysyqtaldy, dep habarlaıdy QazAqparat tilshisi.
SQO Tótenshe jaǵdaılar departamentiniń bastyǵy Ramıl Kamalov oblysta kóktemgi sý tasqyny zardabynyń aldyn alý maqsatynda qandaı jumystar atqarylyp jatqandyǵy týraly esep berdi. Vedomstvo ókili daıyndyq barysynda týyndaǵan problemalardy da atap kórsetti.
«Jaǵdaıdy únemi baqylaýda ustap otyrmyz. Sý tasqyny bolǵan kúnde turǵyndardy qaýip-qatermen betpe-bet qaldyrmaımyz. Óńirde jyldam áreket etetin 8 top quryldy. Oǵan quqyq qorǵaý organdarynan 475 adam kirdi. 134 tehnıka daıyn tur. Jaǵdaıǵa baılanysty olardy sý tasqyny bolǵan eldi mekenge jóneltemiz. Aýyr ınjenerlik tehnıkany bıyl da jalǵa alamyz. Qazirgi ýaqytta eldi mekenderden qardyń shyǵarylýy, aryqtardyń, sý ótkizgish qubyrlarynyń, káriz júıesiniń tazartylýyn qadaǵalap otyrmyz», - dedi Ramıl Kamalov.
Departament bastyǵynyń aıtýynsha, jergilikti atqarýshy organdar kóktemgi sý tasqynynyń aldyn alý maqsatynda tıisti jumystardy atqaryp jatyr. Oblystyń eldi mekenderinen búginge deıin 596 myń tekshe metr qar shyǵarylǵan, 257 km aryq tazartylyp, avtomobıl joldaryndaǵy 600-ge jýyq sý ótkizgish qubyr ashyldy.
Ýálıhanov, Aıyrtaý aýdandaryndaǵy shaǵyn ózender men kólderde muz jarý jumystary júrgizildi. Birer kúnde mamandar bul jumysty Taıynsha men Ǵ.Músirepov atyndaǵy aýdanda atqarady.
Qutqarýshylar turǵyndarmen de kezdesýler uıymdastyryp jatyr. Ramıl Kamalovtyń aıtýynsha, kóktemgi sý tasqynyna daıyndyq aılyǵy aıasynda 200 eldi mekenniń turǵyndarymen kezdesý mindeti tur. Búginge deıin 265 reıd, 35,5 myń turǵyndy qamtyǵan 160 jınalys ótti.
