SQO-da kóktemgi sý tasqynymen kúreske 675,5 mln teńge qarajat bólindi

PETROPAVL. QazAqparat – Soltústik Qazaqstan oblysynda kóktemgi sý tasqyny qaterine jedel áreket etý maqsatynda 500-ge jýyq adam jáne júzden astam tehnıkasy bar kúsh pen quraldardyń toby quryldy, dep habarlaıdy QazAqparat tilshisi.

SQO Tótenshe jaǵdaılar departamenti baspasóz qyzmetiniń málimetinshe, oblys ákimi kóktemgi sý tasqynyna daıyndalý, ótkizý jáne oblys aýmaǵynda yqtımal zalaldy azaıtý jóninde negizgi is-sharalar josparyn bekitti. Óńirde jarııalanǵan aılyq aıasynda sý tasqyny jolynda ornalasqan eldi mekender turǵyndarymen túsindirý jumystary júrgizilip jatyr.

Qazirgi ýaqytta óńirde kóktemgi sý tasqyny qaterine jedel áreket etý maqsatynda 475 adam jáne 134 tehnıkasy bar kúsh pen quraldardyń toby quryldy. Onyń ishinde qutqarýshylar, Ulttyq gvardııanyń sarbazdary jáne polıtsııa departamentiniń qyzmetkerleri bar.

Departamentte halyqty tasymaldaýǵa jáne evakýatsııalaýǵa arnalǵan 10 vahtovka mashınasy, jol talǵamaıtyn 5 kólik, 5 júzý quraly, 85 motopompa, 370 sý ótkizbeıtin kostıým jáne 416 adam syıatyn 21 shatyr bar. Bıyl da bul tehnıkalyq resýrs sý tasqyny bolýy múmkin eldi mekenderge aldyn ala jetkiziletin bolady.

Al sý tasqyny kúrdeli ótken jaǵdaıda jergilikti atqarýshy organdar 2 myńnan astam adamdy, shamamen 1 300 tehnıkany shyǵarmaq. Budan basqa 198 tonna janar-jaǵar maı, 30 myń tonna ınertti materıal jáne 36 myń qap daıyndaldy.

Byltyr kóktemgi sý tasqynymen kúreske 504 mln teńge bólinse, bıyl jergilikti atqarýshy organdar rezervinen 675,5 mln teńge bekitildi.

Buǵan deıin SQO-da 85 aýyldy sý basýy yqtımal ekenin aıtqan edik.

Sondaı-aq arnaıy qyzmetterdiń kóktemgi sý tasqynyna daıyndyǵyn pysyqtaý maqsatynda respýblıkalyq komandalyq-shtabtyq oqý-jattyǵýlar ótti.