SQO-da kóktemgi sý tasqyny jaǵdaıyna monıtorıng júrgizildi
PETROPAVL. QazAqparat – Soltústik Qazaqstan oblysynda kóktemgi sý tasqynynyń jaǵdaıyn baǵamdaý maqsatynda mamandar tikushaqpen aýmaqqa monıtorıng júrgizdi, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń málimetinshe, 2-3 sáýirde óńirdegi sý tasqyny jaǵdaıyn baıqaý maqsatynda sý tasqyny qaýpi bar aımaqtar tikushaqtan baqylandy. QR Іshki ister mınıstriniń orynbasary ıÝrıı Ilın, SQO ákiminiń orynbasary Anton Fedıaev, ІІM TJK SQO TJ departamentiniń bastyǵy Ramıl Kamalov Aıyrtaý, Ǵ.Músirepov, Shal aqyn, Esil jáne Qyzyljar aýdandary men Petropavl qalasynyń aýmaǵynan ushyp ótti.
Mamandar Imantaý, Kishi Torańǵyl jáne Úlken Torańǵyl kólderindegi muz jaǵdaıyn baǵalady. Sondaı-aq, Sergeev sý qoımasynyń bógeti de nazardan tys qalmady. Oblystyń basty sý arterııasy – Esil ózeni men onyń tarmaqtary - Sharyq, Aqanburlyq, Babyqburlyq, Imanburlyq, Jembaraq, Qamysaqty ózenderi bıyl da arnasynan aspaq.
«Jaǵdaı shıelenisken jaǵdaıda qolǵa alynatyn is-sharalar josparyn pysyqtap, keıbirine túzetý engizildi. Jalpy, ylǵal qory oblystyń ońtústik óńirinde – Aıyrtaý, Ǵ.Músirepov, Tımırıazev aýdandarynda mol. Al óńirdiń ortalyq, soltústik jáne soltústik-shyǵys bólikterinde qar túgeldeı derlik erip ketti», - delingen baspasóz habarlamasynda.
Oblys aýmaǵynda sý tasqynymen kúreste jedel áreket etý úshin quramynda 484 adam, 155 tehnıka, 8 júzý quraly jáne 72 motopompa bar TJD kúshteri men quraldary toby daıyn.
Óńirdiń ońtústik aýdandarynda kóktemgi sý tasqyny bastaldy.
Osyǵan oraı, Ǵ.Músirepov, Ýálıhanov jáne Aıyrtaý aýdandaryna TJD vedomstvolyq baǵynysty bólimshelerinen 9 tehnıka, jeke quramnan 40 adam, 5 júzý quraly jáne 7 motopompa shoǵyrlandyryldy.
