SQO-da kóktemgi sý tasqyny bastaldy
PETROPAVL. QazAqparat – Soltústik Qazaqstan oblysynda kóktemgi sý tasqyny bastaldy. Erigen qar sýy óńirdegi eki avtojoldy shaıyp ketti, dep habarlaıdy QazAqparat tilshisi.
SQO tótenshe jaǵdaılar departamenti óńirdegi sý tasqyny boıynsha brıfıng ótkizdi. Vedomstvo basshysynyń orynbasary Murat Qanǵojınovtyń aıtýynsha, qutqarýshylar 25 naýryzdan beri oblys ákiminiń tapsyrmasymen joǵary daıyndyq rejıminde jumys istep jatyr. Sý tasqynynyń aldyn alý maqsatynda birqatar is-sharalar júrgizildi.
«Sáýir aıynyń besinen bastap aýa raıy jylynyp, qar tez erı bastady. Keshe Esil aýdany Gornoe elimekeniniń mańynda sý oblystyq mańyzy bar avtojoldy shaıyp ketti. Jol ústinen ótken sýdyń tereńdigi 5 sm, uzyndyǵy 30 metr boldy. Búgin tańerteń sýdyń joldan asyp tógilý aýmaǵy 10 metrge azaıdy.
Búgin Shal aqyn aýdanynda Voloshınka-Sergeevka-Tımırıazevo baǵytyndaǵy respýblıkalyq mańyzy bar KT27 avtojolynyń 40 km-de, Qaratal aýylyna 4 km jetpeı, alqaptardaǵy qardyń erýinen sý joldy shaıyp ketti. Jol ústinen ótken sýdyń tereńdigi 15 sm, 45 metr jerdi alyp jatyr. Bul eki jolmen de kólikter esh kedergisiz júrip jatyr. Jol qyzmetteri tıisti jol belgilerin qoıdy», - deıdi SQO TJD bastyǵynyń orynbasary Murat Qanǵojınov.
Departamentte jedel shtab jumys istep jatyr. Keshe turǵyndar kómek surap, 19 ótinish túsirgen. Erigen qar sýy úılerge kirmeýi úshin motopompalarmen soryldy, ekskavatormen jyralar qazyldy. Oblys boıynsha, búginge deıin turǵyn úılerge sý kirý deregi tirkelgen joq.
«Ǵ.Músirepov atyndaǵy jáne Aıyrtaý aýdandarynda shaǵyn ózenderde sý molaıyp jatyr. Olar keıin Esilge quıylyp, Sergeev sý qoımasyna keledi.
Sergeev sý qoımasynda jaǵdaı ázirge turaqty, asyp tógilýi úshin áli 1 metr kerek. Byltyr bul ýaqytta erneýinen asqan edi.
«Qazgıdromet» ózen-kólderdegi sý deńgeıi, aýa temperatýrasy, topyraqtyń qatýy boıynsha kúndelikti habardar etip otyr. Kóktemgi sý tasqynynyń zardabyn azaıtý maqsatynda jergilikti atqarýshy bılikpen birge jumystar atqarylyp jatyr. Birer kún buryn eki top Ǵ.Músirepov atyndaǵy jáne Aıyrtaý aýdandaryna jiberildi», - deıdi Murat Qanǵojınov.
