SQO-da kóktemgi egiske 74 myń tonnaǵa jýyq janar-jaǵarmaı bólinbek

PETROPAVL. QazAqparat – Soltústik Qazaqstan oblysyna kóktemgi dala jumystaryna qajet janar-jaǵar maı bıyl jyldaǵydan bir aı buryn berile bastady. Bul dál qajet ýaqytta suıyq otyn tapshylyǵyn týdyrmas úshin qolǵa alynǵan shara, dep habarlaıdy QazAqparat tilshisi.

SQO aýyl sharýashylyǵy jáne jer qatynastary basqarmasynyń málimetinshe, bıyl óńirge jer jyrtý, dán sebý, dárileý sııaqty jumystardy atqarýǵa 73,6 myń tonna janar-jaǵar maı qajet.

«Aqpan aıynda 18,6 myń tonna janar-jaǵar maı óńirge keledi. Jalpy, qajetti suıyq otyn maýsymǵa deıin jetkizilmek. Ár aıdyń óz mólsheri bar, ol keste boıynsha ákelinedi. Pavlodar munaı-hımııa zaýytynan 53 myń tonna, Atyraý munaı óńdeý zaýytynan 20,6 myń tonna ónim bólindi», - deıdi basqarma basshysy Meıram Meńdibaev.

Mamannyń aıtýynsha, bıyl óńirge janar-jaǵarmaı jetkizý kestesi boıynsha jumystar bir aıǵa erte bastalyp otyr.

«Arzandatylǵan suıyq otyn dıqandarǵa dál kerek ýaqytynda jetip, jumystary toqtap turmaýy úshin jyldaǵy tájirıbe eskerildi. Dızel otynynyń tapshylyǵyn týdyrmas úshin Aýyl sharýashylyǵy mınıstrligi men Energetıka mınıstrligi kóktemgi dala jumystaryna qajet janar-jaǵarmaıdy óńirlerge jetkizý kestesin jasady», - deıdi Meıram Meńdibaev.

Byltyr SQO-ǵa ósimdik sharýashylyǵyn damytýǵa jalpy somasy 29,3 mlrd teńge bólindi.

Bıyl osy salaǵan 19,6 mlrd teńge jumsalmaq.