SQO-da kóktemgi egis jumystary pysyqtaldy

Bıyl 4,1 mln ga alqapqa dán sebilmek, onyń 2,6 mln gektaryna bıdaı egiledi. Kartop pen kókónisterdiń alqaptary eki ese ulǵaımaq. Egis alqaptaryn ártaraptandyrý jumysyna kóp kóńil bólinedi. Bıyl soltústik óńir maıly daqyldardyń alqaptaryn odan saıyn ulǵaıta túspek.

«Byltyr bizdiń dıqandar maıly daqyldardyń alqaptaryn 40 paıyzǵa ulǵaıtty. Bıyl da bul jumyspen belsendi aınalysyp jatyrmyz. Tuqym daıyndaldy, sýbsıdııalaý mehanızmderin anyqtadyq. Bıyl maıly daqyldardyń alqabyn 1 mıllıon gektarǵa jetkizemiz. Qazir maıly daqyldar asa paıdaly bolyp tur: raps pen zyǵyrdyń baǵasy joǵary, al bıdaıdyń quny kúzden beri ósken joq. Halyqtyń da tabysy osyǵan táýeldi ǵoı», - dedi oblys ákimi Qumar Aqsaqalov.
 

Bıyl dıqandar jerge 109 myń tonna mıneraldy tyńaıtqyshtardy salýdy kózdep otyr. 3,5 mln. gektar aýmaqta hımııalyq óńdeý júrgizilse, zııankester men aýrýlarǵa qarsy 720 myń gektar óńdelmek. Bıyl 548 myń tonna tuqym daıyndaldy. Kóktemgi egiske 66 myń tonna dızel otyny bólindi. Kóktemgi egiske 13662 traktor, 16299 egin sepkish, 1147 joǵary ónim keshenderi shyǵady.

«Bıyl agrarshylar 1310 birlik jańa tehnıkany satyp alýdy kózdep otyr, oǵan 34,2 mlrd teńge jumsaıdy. Bıylǵy jyldyń alǵashqy toqsanynda 3 mlrd. teńgege 212 jańa tehnıka alyndy. «Qazagroqarjy» uıymyna 7,3 mlrd teńgeniń 122 tapsyrysy tústi», - dedi oblys ákiminiń birinshi orynbasary Aıdarbek Saparov.

Qazir óńirdiń 26 agroqurylymy 500 myń gektar aýmaqta spýtnıktik monıtorıng júrgizedi. Bıyl tsıfrlendirýdi 50 sharýashylyq engizbek. Alqaptardyń elektrondy kartalary da keńinen qoldanylýda. Qazir 2,5 mln. ga nemese 52 paıyzy tsıfrlendirildi.

Jalpy, memleket óńirdiń egis sharýashylyǵyna sýbsıdııa túrinde 16,3 mlrd teńge baǵyttamaq.

Jıyn sońynda SQO ákimdigi men Sáken Seıfýllın atyndaǵy Qazaq agrotehnıkalyq ýnıversıteti arasynda memorandým jasaldy. Qujatqa oblys ákimi Qumar Aqsaqalov pen ýnıversıtettiń basqarma tóraǵasy Aqylbek Kúrishbaev qol qoıdy.