SQO-da kóktemgi egis bir apta kesh bastalýy múmkin

SQO-daǵy sharýashylyqtardyń biriniń jetekshisi Jomart Omarovtyń aıtýynsha, dıqandar úshin ár kóktem óz ereksheligimen keledi. Máselen byltyr 5 sáýirde alqaptarda qar bolmaı, 17 sáýir ylǵal jabý jumystaryn bastap ketken.

«Byltyr kóktem erte shyqty. Sáýir aıynyń sońynda aýa temperatýrasy +28 gradýsqa deıin kóterildi. Bıyl kóktem kesh shyǵyp jatyr. Alqaptarda qar kóbesi áli sógilgen joq. Qysta qar toqtatqan jerlerde qardyń bıiktigi áli kúnge 70-80 sm-ge jetedi», - deıdi «Tokýshı Grain» JShS dırektory Jomart Omarov.

Ótken jazda qýańshylyq bolǵandyqtan, tájirıbeli dıqan bıyl qańtar aıynyń sońy men aqpan aıynyń basynda qar toqtatý jumystaryn júrgizgen. Aqpan-naýryz boı qar jaýyp, boran turyp, jaýyn-shashyn jyldaǵy normadan artyǵymen jaýdy. Jerdiń ylǵal qorynyń joǵary bolýy – bul bıylǵy kóktemniń taǵy bir ereksheligi.

«Ylǵaldyń mol bolǵany jaqsy, qar ketip, jer kebisimen-aq tehnıka ylǵal jabý jumystaryna kirisedi. Traktor, qajetti kerek-jaraqtarymyzdy saılap jatyrmyz. Pandemııa saldaryn tıgizbeı qoımady. Qosalqy bólshekter orta eseppen 15-20 %-ke qymbattap ketti. Kóktemgi egisti júrgizýge qajet dızel otynyna Úkimet bekitilgen baǵany qoıdy. Lıtri 172 teńge, naryqtaǵy baǵadan 15-20 teńgege arzan. Bul da bolsa kómek», - deıdi Jomart Omarov.

Sharýashylyqtyń 7 myń ga jeri bar. Bıdaı, arpa, suly, zyǵyr jáne jasymyq egedi. Byltyr qýańshylyqqa qaramastan jaqsy ónim aldy.

«Tyńaıtqysh alyp jatyrmyz. Jazda alqaptarda aramshópke qarsy is-sharalar júrgiziledi. Jerdiń yrzyǵyn kórý úshin jumys isteý kerek. Sonda ǵana nátıje bolady. Meniń pikirimshe, bıyl kóktemgi egis bir aptaǵa kesheýildeýi múmkin. Qazir bári aýa raıyna baılanysty. Jalpy bıdaıdyń shyǵýyna úsh jaǵdaı kerek: jyly topyraq, ylǵal jáne kún sáýlesi. Eger kún kúrt ysıtyn bolsa, merziminde, mamyr aıynyń ortasynda kóktemgi egisti bastaýymyz múmkin», - deıdi sharýashylyq dırektory Jomart Omarov.