SQO-da kóktemgi sý tasqynynyń ekinshi tolqyny ótip jatyr
PETROPAVL. KAZINFORM – Soltústik Qazaqstan oblysynda Sergeev sý qoımasynyń deńgeıi qaıta kóterilip jatyr.
«Qazgıdromet» kásiporny oblystyq fılıalynyń málimetinshe, Aqmola oblysynan kelgen aǵyn sý esebinen Esil ózeniniń sý deńgeıi qaıta kóterile bastady. Ǵabıt Músirepov atyndaǵy aýdannyń Shóptikól aýylynyń mańynda ózen deńgeıi ótken táýlikte 39 sm-ge kóterildi. Drýjba aýylynyń mańynda 28, al Toqsan bı aýylynyń qasynda 24 sm-ge artty. Sergeevka qalasynyń janynda bir táýlikte 15 sm-ge, al sý qoımasynda 8 sm-ge joǵarylaǵany tirkeldi.
Mamandardyń aıtýynsha, ekinshi tolqynnyń sharyqtaý shegi boljam boıynsha gıdrologııalyq bekette sáýir aıynyń sońynda ótedi.
Al Petropavlda Esil ózeniniń sý deńgeıi túse bastady. Ótken táýlikte qaladaǵy sý qoımasynyń deńgeıi 6 sm-ge tómendedi.
Osyǵan oraı búgin saǵat 11:00-de respýblıkalyq mańyzy bar KZ15-09 «Petropavl qalasynyń aınalma joly» avtojolynyń 25-30 shaqyrym aralyǵy kóliktiń barlyq túri úshin ashylady. Buǵan deıin Esil tasyp, sýdyń asfaltqa jaıylýyna baılanysty kólik qozǵalysyna shekteý qoıylǵan edi.
