SQO-da kóktem shyqqaly 6 adamdy kene shaqty
PETROPAVL. QazAqparat – Soltústik Qazaqstan oblysynda epıdemııalyq maýsym bastalǵaly 6 adamdy kene shaqty, zardap shekkenderdiń úsheýi - bala, dep habarlaıdy QazAqparat tilshisi.
SQO sanıtarııalyq-epıdemıologııalyq baqylaý departamentiniń málimetinshe, byltyr óńirde 408 adamdy kene shaqqan, bul onyń aldyndaǵy epıdemıologııalyq maýsymmen salystyrǵanda 9 %-ǵa artyq. Búginde kene shaqqan 6 adam dárigerge kóringen, olardyń úsheýi – bala. Byltyr 9 adam kene entsefalıtin juqtyrsa, bıyldyqqa aýrý tirkelgen joq.
«Kene entsefalıti qaýipti ınfektsııalyq aýrý. Ortalyq júıke júıesin zaqymdaıdy. Aýrýdyń saldarynan adam múgedek bolyp qalýy, tipti ólýi de múmkin. Vırýsty jólek-ıksodty keneler taratady. Tabıǵı oshaqta jumys isteıtinder úshin ár úsh jyl saıyn kúzdiń sońynda vaktsınatsııa júrgiziledi. Vaktsına almas buryn dárigerdiń keńesi qajet», - deıdi SQO sanıtarııalyq-epıdemıologııalyq baqylaý departamentiniń bas mamany Aınash Saǵandyqova.
Ormanǵa, tabıǵat aıasyna shyqqan jaǵdaıda uzyn jeńdi jáne aqshyl reńdi kıim kıgen durys, óıtkeni qara kene aq túste jaqsy kórinedi.
«Kene shópte nemese aǵash butaǵynda otyrady. Biraq 1,5 metrden joǵary kóterilmeıdi, sondyqtan olar ádette adamnyń aıaǵyna jabysyp, joǵary órmeleıdi. Baıaý jándikter adam denesine birden jabyspaıdy, yńǵaıly, tasa oryn izdeıdi. Sondyqtan ústi-basty silkip, durystap qarap shyqqan jón. Sondaı-aq krem, gel aerozol sekildi repellentterdi qoldaný qajet», - deıdi Aınash Saǵandyqova.
Kene shaǵyp alǵan jaǵdaıda turǵylyqty jeri boıynsha emhanaǵa baryp kóringen jón.
Keneler, masa, shybyn-shirkeımen kúresý úshin óńirde profılaktıkalyq óńdeý jumystary júrgizilip jatyr. 22 sáýirge deıin SQO-nyń 360 ga aýmaǵy dezınsektsııalanady.
