SQO-da kóktem erte kelip, órt shyǵý jaǵdaıy kóbeıdi

PETROPAVL. KAZINFORM – Coltústik Qazaqstan oblysynda órt qaýipti kezeń 14 sáýirde bastalady. Alaıda qazirdiń ózinde dala órti jıilegen.

SQO Tótenshe jaǵdaılar departamenti memlekettik órtti baqylaý basqarmasynyń bastyǵy Aslan Ahmetjanovtyń aıtýynsha, kepken shóptiń janý faktisi 25 naýryzdan bastap tirkele bastady. Byltyr alǵashqy osyndaı órt 18 sáýirde shyqqan.

- Taıynsha aýdanynda 14 órt, Petropavlda 2, Aıyrtaý, M.Jumabaev jáne Jambyl aýdandarynda bir jaǵdaıdan tirkeldi. Jalpy órtengen aýmaq 30 ga alyp jatyr. Turǵyndardyń beıǵamdyǵy órttiń shyǵýyna sebep bolǵan. Qazir qystan qalǵan qoqysty, kepken shópti jınap, kúıdirý bastalady. Sondyqtan qarapaıym erejelerdi umytpaý kerek. Qaldyqtardy ǵımarattar men qurylystardan 50 metr qashyqta jaǵý kerek. Ol únemi bir adamnyń baqylaýynda bolǵany jón, - deıdi Aslan Ahmetjanov.

Maman órt qaýipti kezeńde aýyl sharýashylyǵy alqaptarynda, jaıylymdyq jerlerde onyń kimniń menshiginde bolǵanyna qaramastan qurǵaq shópti jaǵýǵa tyıym salynǵanyn eskertti.

Qamys pen qurǵaq shópti sharýashylyq jáne óndiristik qajettilik bolǵan jaıdaıda, órttiń paıda bolý qaýpin azaıtý maqsatynda ǵana shabýǵa bolady.

- Sharýashylyqtardyń basshylary, jeke tulǵalar, kásipkerler men orman ıelenýshiler aýyl sharýashylyǵy jáne jaıylymdyq alqaptarda shópterdi, sabandy, sondaı-aq ormandy dala alqaptarynyń aýmaqtarynda aǵash butaqtaryn kúıdirýdi órt qaýipti kezeń bastalǵanǵa deıin nemese aıaqtalǵannan keıin ǵana órt qaýipsizdigi sharalaryn saqtap júrgize alady, - deıdi Aslan Ahmetjanov.

Buǵan deıin Almatyda 6 qabatty ákimshilik ǵımaraty órtengenin jazdyq.