SQO-da kóktem eki aptaǵa erte bastaldy – sınoptık

PETROPAVL. QazAqparat – Soltústik Qazaqstan oblysynda bıyl kún erte jylynyp, kóktem shamamen eki aptaǵa erte keldi, dep habarlaıdy QazAqparat tilshisi.

SQO ákimdiginde kóktemgi sý tasqynyna qatysty ótken jıynda «Qazgıdromet» RMK oblystyq fılıalynyń dırektory Qymbat Merǵalımova óńirdiń gıdrometeorologııalyq jaǵdaıyna toqtaldy.

«Óńirdegi qar jabyndysy 16-23 naýryz aralyǵynda 17 % azaıǵan. Taıynsha, Ýálıhanov, Aqjar aýdandarynda qar shamaly ǵana qalǵan.

Jalpy bıyl naýryz aıy jyldaǵyǵa qaraǵanda jyly. Osyǵan baılanysty qar qarqyndy erip, saı-sala sýǵa toldy. Ǵ.Músirepov, Taıynsha, Aqjar, Tımırıazev aýdanynda jer qabaty 20-33 sm eridi. Bul jyldaǵy normadan 10-15 kúnge erte», - deıdi Qymbat Merǵalımova.

Sergeev sý qoımasyna quıatyn salalardaǵy sý qory jyldaǵy kórsetkishten 2,4 ese artyq. Mamandardyń aıtýynsha, oblystyń ózenderindegi sý deńgeıi keı jerlerde táýligine 5 sm deıin kóterilip keledi.

Desek te, Esil ózeninde muzdyń qalyńdyǵy 50-98 sm bolsa, shaǵyn ózenderde 34-90 sm aralyǵynda.

«29-31 naýryz aralyǵynda oblysqa tómen qysym áser etedi. Aýa-raıy turaqsyz bolady. 29 naýryz oblystyń keı aýdandarynda jańbyr jaýady. Batysy men soltústiginde kóktaıǵaq bolady. Jel turyp túnde ekpini sekýndyna 15-20 metr, kúndiz 25 metrge deıin jetpek. Aýa temperatýrasy túnde -5, keı jerlerde -10 gradýsqa deıin sýytpaq», - deıdi Qymbat Merǵalımova.

Sınoptıktiń aıtýynsha, sáýirdiń kelýimen qaıta kún jylynady. Aıdyń alǵashqy kúnderi synap baǵanasy +14 gradýsqa deıin kórsetpek.