SQO-da kóktem bastalǵaly sý shaıǵan avtojoldardyń 21-inde jaǵdaı turaqtandy
PETROPAVL. KAZINFORM – Soltústik Qazaqstan oblysynda kún jylynǵaly 24 avtojoldy sý bassa, qazir bul ýchaskelerdiń basym bóliginde jaǵdaı jaqsarǵan.

SQO Tótenshe jaǵdaılar departamenti josparlaý jáne jedel basqarý ortalyǵynyń bastyǵy Vladımır Hýtınaevtyń aıtýynsha, qazirgi ýaqytta aýdandyq mańyzy bar úsh jol ýchaskesinde sý jatyr.
- Ýálıhanov aýdanyndaǵy Qaratal men Birlik aýyldarynda energetıkter men bizdiń departamenttiń qyzmetkerleri apattyq-qutqarý jumystaryn júrgizip jatyr. Sileti ózenindegi sý deńgeıiniń kóterilýine baılanysty munda 3 elektr taratý baǵany zaqymdanǵan edi. Bul eki aýylda kesheden beri jaryq joq, - deıdi Vladımır Hýtınaev.
Mamannyń aıtýynsha, osy eki eldi meken mańyndaǵy ózende muz jarý jumysy júrgiziledi. Bul maqsatqa arnaıy jarý tehnıkteri shaqyryldy.
- Ýálıhanov aýdanynda Sileti ózeniniń deńgeıi kóterilip jatyr. Qaratal men Qýlykól aýyldarynyń mańynda sý jol ústinen ótip ketti. TJD qyzmetkerleri «vahtovka» kóligimen aýyl turǵyndaryna kerek zattaryn jetkizip berip jatyr. Budan bólek eldi mekenderge baratyn aınalma jol bar. Turǵyndardy aýyldan evakýatsııalaýdyń qajeti joq, - deıdi Vladımır Hýtınaev.
«Qazgıdromet» RMK SQO fılıalynyń málimetinshe, óńirdegi sý aıdyndarynda jaǵdaı turaqty. Bıyl ótken jylǵydaı alapat sý tasqyny qaıtalanbaıdy. Qazirgi meteorologııalyq kórsetkishter 2014 jylǵy jaǵdaıǵa uqsas.
- Keı jaǵdaılarda tabıǵı apattyń bolýyna kóktemgi faktorlar áser etedi. Kóktemniń erte ne kesh kelýi, sondaı-aq topyraqtaǵy ylǵaldyń jınalýy. Eger ótken jyly sý tasqynyna daıyndyq 28 naýryzda bastalsa, bıyl erte iske kiristik. Ótken jylmen salystyrǵanda aıtarlyqtaı qaýip joq, - deıdi fılıal basshysy Qymbat Merǵalımova.
Buǵan deıin SQO-da drondar naqty ýaqyt rejıminde sý tasqynyn baqylaýǵa alǵanyn jazdyq.