SQO-da kókshetaýlyq turǵyn lıtsenzııasy joq myń lıtrge jýyq spırtti satpaq boldy
SQO polıtsııa departamenti baspasóz qyzmetiniń málimetinshe, Qyzyljar aýdanynyń ortalyǵy Beskól aýylynda ýchaskelik ınspektor alkogoldi zańsyz satý faktisin anyqtady.
Kókshetaý qalasynyń 52 jastaǵy turǵyny avtokóligin jergilikti dámhanalardyń biriniń aýlasyndaǵy ońasha jerge qoıyp, avtodúken uıymdastyrǵan. Ol sol jerde jergilikti turǵyndarǵa jáne Petropavldan kelýshilerge lıtsenzııasy joq 5 lıtrlik bótelkelerge quıylǵan alkogoldi satqan. Tekserý kezinde ónimdi satýǵa ruqsat qujattary bolmaǵan.
Polıtseıler «avtodúkennen» 945 lıtr - barlyǵy 189 bótelkeni tárkiledi.
Tártip saqshylary «Tıisti tirkeýsiz, ruqsatsyz nemese habarlama jibermeı kásipkerlik nemese ózge de qyzmetpen aınalysý, sondaı-aq áreketterdi (operatsııalardy) júzege asyrý» boıynsha materıal jınady.
«Tutynýshylar shyqqan jeri jáne sapasy belgisiz spırttik ónimdi alǵan. Oǵan eshkim kepildik bermeıdi, sol sebepti turǵyndardyń densaýlyǵyna zııan tıgizýi múmkin. Alkogoldi mólsherden kóp paıdalaný qylmys pen quqyq buzýshylyqtardyń jasalýyna ákeledi, sondyqtan zańsyz saýdamen kúres - zań buzýshylyqtardyń aldyn alýdaǵy jumystyń mańyzdy quramdas bóligi», - deıdi Qyzyljar aýdandyq polıtsııa bóliminiń bastyǵy Álıhan Baıqadamov.
