SQO-da qoqys úıindilerin joımaǵan aýyldyq okrýgterdiń 9 ákimi jazalandy

PETROPAVL. KAZINFORM – Soltústik Qazaqstan oblysynda byltyr ruqsat etilmegen 116 qoqys orny anyqtaldy.

SQO ákimdiginde «Taza Qazaqstan» baǵdarlamasynyń oryndalý barysy pysyqtaldy.

SQO ekologııa departamentiniń málimetinshe, anyqtalǵan zańsyz qoqys oryndary boıynsha aýdandyq jáne qalalyq ákimdikterge tıisti hat joldanǵan. Alaıda zańsyz polıgondardyń 91% ǵana joıyldy. Shara qoldanbaǵan 9 aýyldyq okrýg ákimine 221 myń teńgeden astam aıyppul salyndy.

Qazirgi ýaqytta Qyzyljar aýdany Báıterek aýyly mańyndaǵy qoqys polıgonyna qatysty másele bar. Osydan tórt jyl buryn departament Beskól aýyldyq okrýg ákimi apparatyna qatysty jospardan tys tekseris júrgizip, 8 ga aýmaqta ruqsatsyz qoqys polıgonynyń jaıylyp jatqanyn anyqtady. Nátıjesinde Beskól aýyldyq okrýg ákimine 87,5 myń teńge aıyppul salynyp, olqylyqty joıýǵa uıǵarym berildi.

SQO mamandandyrylǵan aýdanaralyq ekonomıkalyq soty aýyl ákimine qorshaǵan ortany qalpyna keltirip, eki aı ishinde qoqys ornyn joıýǵa sheshim shyǵardy. Alaıda, nátıje joq. Sot bul joly osy jyldyń 1 maýsymyna deıin polıgondy joıýǵa ýaqyt berdi.

Mamandardyń aıtýynsha, Báıterek aýylynyń mańyndaǵy ruqsatsyz paıda bolǵan qoqys orny Petropavl qalasy áýejaıynyń 13 km aýmaǵynda ornalasqan.

«QR áýe keńistigin paıdalaný jáne avıatsııa qyzmeti týraly» Zańnyń 90-babynyń 4-tarmaǵyna sáıkes áýejaıǵa 13 shaqyrymǵa deıingi aýmaqta qoqys polıgondaryn ornalastyrýǵa tyıym salynady. Óıtkeni qoqys orny qustardyń jappaı jınalýyna ákelip, ushaqtardyń ushýyna qater tóndirýi múmkin.

Buǵan deıin SQO-daǵy 450 qoqys polıgonynyń tek 11-inde ǵana qujat bar ekendigin jazdyq.