SQO-da qoǵamdyq orynda mas júrgen 11 myńnan astam adam jazalandy

PETROPAVL. QazAqparat – Soltústik Qazaqstan oblysynda polıtseıler 29 jastaǵy Petropavl turǵynyn úsik alýdan qutqardy, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, Petropavlda júrginshiler «Petropavl-Esil» avtotrassasyna kezekshilik atqarýǵa baǵyt alǵan patrýldi polıtsııa batalonynyń ekıpajyn toqtatqan. Qala turǵyndary jol aıryǵynyń mańynda er adamnyń jatqanyn aıtqan. Polıtseıler aıtqan jerden jigitti tapty. Ol qar ústinde otyryp, aıaq kıimin sheshpek bolǵan. Tártip saqshylary qatty tońǵan er adamdy patrýldik mashınaǵa otyrǵyzyp, jedel járdem kóligin shaqyrtty. 29 jastaǵy qala turǵyny spırttik ishimdik ishken eken. Medıtsınalyq qyzmetkerler er adamdy jaraqat bólimine jetkizdi, der kezinde kórsetilgen kómektiń arqasynda ol úsik shalýdan aman.

«Adam túrli quqyq buzýshylyqtarǵa mastyqpen barady jáne spırttik ishimdik ishýdiń saldarynan túrli keleńsiz jaǵdaılarǵa urynyp jatady. Olardy boldyrmaý - jergilikti polıtsııa qyzmeti mindetteriniń biri. Ótken jyly oblysta spırttik ishimdikter ishkeni jáne qoǵamdyq orynda mas kúıde júrgeni úshin 11 myńnan astam adam ákimshilik jaýapkershilikke tartyldy», - deıdi SQO PD jergilikti polıtsııa qyzmeti basqarmasynyń bastyǵy Aıdyn Baımatov.