SQO-da qoǵamdyq kólik júrgizýshisi mas kúıinde ustaldy
PETROPAVL. QazAqparat – Soltústik Qazaqstan oblysynda «Avtobýs» jedel-profılaktıkalyq is-sharasynyń eki kúninde jol qozǵalysy erejelerin buzýdyń 128 deregi anyqtaldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, el aýmaǵynda 10 kúndik «Avtobýs» jedel-profılaktıkalyq is-sharasy ótip jatyr. Operatsııaǵa patrýldik jáne ákimshilik polıtsııa, ýchaskelik polıtsııa ınspektorlary jáne barlyq jetekshi qyzmetter tartylǵan. Tártip saqshylarynyń basty mindeti – júrgizýshilerdiń jáne jolaýshylardyń qaýipsizdigin qamtamasyz etý.
Operatsııa barysynda qoǵamdyq kóliktiń tehnıkalyq jaı-kúıine de monıtorıng júrgiziledi. Osyǵan oraı Petropavlda jáne aýdan aýmaqtarynda arnaıy reıdter men tekserister bastaldy. Tek qalalyq jáne qalaaralyq baǵytta júretin avtobýstar ǵana emes, taksı qyzmetteriniń avtokólikteri de tekseriledi.
Jedel-profılaktıkalyq is-shara bastalǵan eki kúnniń ishinde oblys joldarynda jol qozǵalysy erejelerin buzýdyń 128 deregi anyqtaldy. Onyń 35-i rýlde telefonmen sóılesýge, 19-y manevr jasaý erejelerin buzýǵa, 9-y tehnıkalyq tekseristen ótpegen avtony paıdalanýǵa qatysty. Sondaı-aq, bir júrgizýshi kólikti mas kúıde basqarǵany úshin ustaldy.
Bıyl tek qańtar aıynda oblys aýmaǵynda 15 jol-kólik oqıǵasy tirkeldi, saldarynan 6 adam qaza taýyp, 20 adam jaraqat alǵan. Al jolaýshylar kóliginiń qatysýymen aýyr jol-kólik oqıǵasy tirkelgen joq.
«Avtobýs» respýblıkalyq jedel-profılaktıkalyq is-sharasy 2 naýryzǵa deıin jalǵasady.
