SQO-da qoǵamdyq kólik júrgizýshileri 4 kúnde 400-den astam zań buzýshylyq jasaǵan
SQO polıtsııa departamenti baspasóz qyzmetiniń málimetinshe, 5 jeltoqsannan bastap Indýstrııa jáne ınfraqurylymdyq damý mınıstrligi Kólik komıtetiniń aýmaqtyq ınspektsııasy, qoǵam ókilderi jáne tártip saqshylarymen birlesip, «Avtobýs» jedel-profılaktıkalyq is-sharasyn ótkizip jatyr. Maqsat – jol qaýipsizdigi deńgeıin arttyrý, jolaýshylar men júk tasymaldaýdy retteý, jolaýshylar kóliginde apattylyqty tómendetý, mektep oqýshylaryn tasymaldaýdy uıymdastyrýda balalardyń qaýipsizdigin qamtamasyz etý.
Osyndaı reıd barysynda polıtseıler 7 jeltoqsanǵa qaraǵan túni Jambyl aýdanynda taksı belgisi bar «Skoda» avtokóligin tekserý úshin toqtatqan. Júrgizýshiden alkogol ıisi shyǵyp turǵan. Medıtsınalyq kýálandyrý onyń mas ekendigin kórsetti. 43 jastaǵy er adam 15 táýlikke qamaýǵa alyndy, sondaı-aq ol 7 jylǵa kólik basqarý quqyǵynan aıyryldy.
Jalpy, jedel-profılaktıkalyq is-shara ótkizilgen 4 kúnniń ishinde qoǵamdyq kólik júrgizýshileriniń jol erejesin buzýǵa qatysty 423 fakti tirkeldi.
«Jolaýshylar tasymalyndaǵy qaýipsizdik – kólik quralynyń tehnıkalyq jaǵdaıyna qaraý, júrgizýshilerdiń eńbek jáne demalys rejımderin saqtaýy jáne de eń bastysy, jol júrisi erejesin saqtaý. Manevr jasaý erejesin buzý men rólde kele jatyp telefon qoldaný sııaqty zań buzýshylyqtar jıi kezdesedi, osyndaı 104 jáne 49 jaǵdaı anyqtaldy. Sonymen qatar, tehnıkalyq tekseristen ótpegen kólik quralyn basqarǵany úshin 28, kólikti zańsyz qaıta jabdyqtaǵany úshin 7 júrgizýshi jaýapqa tartyldy. Bir avtobýsty paıdalanýǵa tyıym salyndy. Avtobýs parkiniń 2 laýazymdy tulǵasy jaýapqa tartyldy», - deıdi SQO Polıtsııa departamenti jergilikti polıtsııa qyzmeti basqarmasy bastyǵynyń mindetin atqarýshy Aleksandr Rozbah.
