SQO-da qoǵamdyq keńes azyq-túliktiń qymbattaýyn nazarǵa aldy
Nur Otan partııasy SQO fılıaly baspasóz qyzmetiniń málimetinshe, agrarlyq sektordy damytý jónindegi qoǵamdyq keńestiń birinshi otyrysynda aldaǵy ýaqytqa arnalǵan mindetter aıqyndalyp, keńestiń 2021 jylǵa arnalǵan jumys jospary qabyldandy.
Óńirlik saılaýaldy baǵdarlamada aýyl sharýashylyǵyndaǵy eńbek ónimdiligin 2,7 mln teńgeden 4,5 mln teńgege deıin ulǵaıtý, aýyl sharýashylyǵy taýaryn óndirýshilerdi memlekettik qoldaýdy 43 mlrd teńgeden 55 mlrd teńgege deıin jetkizý, 16 ınvestıtsııalyq jobany iske asyrý, onyń ishinde 11 sút fermasyn, 2 bordaqylaý alańyn, qus fabrıkasyn salý kózdelgen. Keńes tóraǵasy Gennadıı Zenchenkonyń aıtýynsha, bul jumystarǵa naqty baqylaý qajet.
«Búgingi kúnniń ózekti máseleleriniń biri – azyq-túlik baǵasynyń ósýi. Іs júzinde barlyq áleýmettik mańyzy bar azyq-túlik taýarlary boıynsha baǵanyń kóterilgeni baıqalady. Byltyrdan bastap jumyrtqa, ósimdik maıy, jarma, et, un, kókónister men jemisterdiń baǵasy óskenin kórip otyrmyz. Bul eń aldymen, shıkizattyń jetispeýshiligimen jáne aýylsharýashylyq óńdeýdiń damymaýymen baılanysty», - deıdi Gennadıı Zenchenko.
Qoǵamdyq keńes tóraǵansy keńeste ýákiletti organdarmen birlesip et-sút fermalaryn, qus fabrıkalaryn, jylyjaı salý jáne jańǵyrtý, egis alqaptaryn keńeıtý esebinen óndiris qýatyn arttyrýdy, aýyl sharýashylyǵy ınfraqurylymyn damytý máselelerin qaraýdy usyndy. Saılaý aldyndaǵy mindettemelerge monıtorıng júrgizýmen qatar keńes músheleriniń aldyna aýyl sharýashylyǵy salasyndaǵy rezonanstyq máselelerdi sheshý mindeti qoıyldy.
«Mysaly, jaqynda mal jaıý úshin jaıylymdyq jerlerdi qaıtarý, sýmen qamtamasyz etý, baǵanyń ósýin tejeý jáne t.b. boıynsha ótinishter túsýi múmkin. Buryn qoǵamdyq qabyldaýǵa paılaryn ala almaı júrgen turǵyndar keletin. Endi mundaı máselelerdi keńeste kóterip, sheshý kerek», - deıdi Gennadıı Zenchenko.
Jalpy SQO-da Nur Otan partııasynyń saılaýaldy baǵdarlamasynyń baǵyttaryn iske asyrý maqsatynda 12 óńirlik keńes qurylǵan. Onyń quramyna máslıhat depýtattary, partııa jaqtastary, belsendiler, sarapshylar, blogerler, qoǵamdyq birlestikter men BAQ ókilderi kirdi. Budan basqa, Petropavlda jáne oblystyń 13 aýdanynda 141 aýmaqtyq keńes quryldy. Jalpy, keńes quramyna 800-den astam adam kiredi.
