SQO-da qoǵam belsendileri jolǵa bólingen qarajattyń ıgerilýin qadaǵalamaq
PETROPAVL. QazAqparat – Soltústik Qazaqstan oblysynda qoǵam belsendileri 600 mln teńge bólingen «Blagoveşenka-Qaırankól» tas jolynyń qurylysyn baqylaýǵa almaq, dep habarlaıdy QazAqparat tilshisi.
SQO Óńirlik kommýnıkatsııa qyzmetiniń alańynda «Bıznesti jáne ınvestıtsııalardy qorǵaý», «Sanaly urpaq», «Adal jol» jáne Arnaıy monıtorıngtik toptar sııaqty jobalardy biriktirgen «Qyzyljar – adaldyq alańy» jobalyq keńsesi qyzmetiniń nátıjeleri boıynsha qorytyndy shyǵaryldy.
QR Sybaılas jemqorlyqqa qarsy is-qımyl agenttiginiń SQO boıynsha departament basshysynyń málimetinshe, 9 aı ishinde jobalyq keńsege 250-den astam azamat kómekke júginip, oblys ortalyǵy men aýdandarda 1000-nan astam is-shara ótkizilgen. Sonymen qatar, sybaılas jemqorlyqqa qarsy qyzmet basshylyǵy óńirdiń Qyzyljar, Esil, M.Jumabaev, Jambyl, Ýálıhanov jáne Aqjar aýdandaryn aralady.
«Máselen, Jambyl aýdanyna jasaǵan saparda fermerler memlekettik sýbsıdııa alý máselesin kóterdi. Aqparattyq júıeniń durys jasalmaǵandyǵynan sharýalar ótinim bere almaı otyr. Servıste olardyń egistik alqaptarynyń bar-joǵyn rastaýǵa múmkindik beretin fermerlik sharýashylyq basshysynyń nemese onyń músheleriniń JSN engizý optsııasy qarastyrylmaǵan», - deıdi QR Sybaılas jemqorlyqqa qarsy is-qımyl agenttiginiń SQO boıynsha departament basshysy Ernar Baıanǵazın.
Jobalyq keńse anyqtaǵan másele respýblıkalyq kólemde baqylaýǵa alyndy. Júıede anyqtalǵan olqylyqtardy Aýyl sharýashylyǵy mınıstrligi qarasha aıynyń sońyna deıin joıatyn bolady.
Sonymen qatar, Departamenttiń «Sapaly jol» jobasy sheńberinde atqarylǵan jumysy atap ótildi. Óńirdegi avtomobıl joldaryna Jol aktıvteriniń ulttyq ortalyǵy fılıalynyń ókilderi, Arnaıy monıtorıngtik top músheleri jáne jurtshylyq turaqty negizde baqylaý júrgizedi.
«Osy aptada «Blagoveşenka-Qaırankól» tas jolyna shyǵý josparlanǵan. Jóndeý jumystaryna 600 mln teńge bólingen. Munda jumystar áli aıaqtalmaǵan. Qazirdiń ózinde turǵyndar «jol jaramsyz» dep dabyl qaǵýda. Departament jumysynda eń aldymen jazalaý sharalaryn júzege asyrýǵa emes, sybaılas jemqorlyq quqyq buzýshylyqtardyń aldyn alýǵa basa nazar aýdarylady», - dedi Baıanǵazın.
Esterińizge sala keteıik, «Qyzyljar – adaldyq alańy» jobalyq keńsesi 2018 jyldyń 24 jeltoqsanynda ashyldy.
