SQO-da qyzyna pyshaq suǵyp alǵan áıel sottaldy

PETROPAVL. KAZINFORM — Soltústik Qazaqstan oblysynda ashý ústinde 11 jasar qyzyna pyshaq suǵyp alǵan áıel 6 jylǵa bas bostandyǵynan aıyryldy.

SQO sotynyń málimetinshe, oblystyq kámeletke tolmaǵandardyń isteri jónindegi mamandandyrylǵan aýdanaralyq soty qylmystyq isti qarady.

Anyqtalǵany, sottalýshy I. 2013 jyly týǵan qyzy A.-nyń úı jumysyn tekserip, dápteriniń jaǵdaıyna kóńili tolmaǵan. Qolyna as úı pyshaǵyn alyp, qyzynyń sol jáne oń jaq jambasyna suǵyp alǵan. Saldarynan jasóspirimniń densaýlyǵyna aýyr zııan kelip, ómirine qaýip tóndi.

Áıel sotta kinásin tolyq moıyndady. Ózi de, týǵan-týystary da ony bas bostandyǵynan aıyrmaýdy surady. Qylmystyń bul túrine 6-10 jyl jaza qarastyrylǵan.

Sot I.-diń kinásin tolyq moıyndaǵanyn, alǵash ret sottalyp otyrǵanyn jáne júktiligin eskerip, 6 jylǵa bas bostandyǵynan aıyrdy.

Áıel jazasyn qylmystyq-atqarý júıesiniń ortasha qaýipsizdik mekemesinde atqarady.

Úkim zańdy kúshine engen joq.

Esterińizge salaıyq, byltyr SQO Ýálıhanov aýdanynda 40 jastaǵy áıel 6-synypta oqıtyn qyzyna pyshaq suǵyp alǵan edi. Aýyr jaraqat alǵan qyz aman qaldy.