SQO-da qyzyn zorlaǵan er adamdy ómir boıyna bas bostandyǵynan aıyrdy

PETROPAVL. KAZINFORM – Soltústik Qazaqstan oblysynyń qylmystyq ister jónindegi mamandandyrylǵan aýdanaralyq soty qyzyn zorlaǵan er adamdy ómir boıyna bas bostandyǵynan aıyrdy.

SQO soty baspasóz qyzmetiniń málimetinshe, qylmystyq is 121-baptyń 4- tarmaǵy boıynsha qaraldy.

Sottalýshy byltyr maýsym aıynda kishkentaı qyzynyń dármensizdigin paıdalanyp, jynystyq qatynasqa túsken. Onyń kinási zardap shegýshiniń kórsetýimen, fotosýrettermen jáne saraptamalardyń qorytyndysymen dáleldendi.

Prokýror jáne kámelet jasqa tolmaǵan balanyń ókilderi sottalýshyny ómir boıyna bas bostandyǵynan aıyrý jazasyn surady. Er adam da, ony qorǵaýshy da aıyptaýmen kelispeı, aqtaýdy surady.

Qylmystyq jaýapkershilikti jeńildetetin de, aýyrlatatyn da jaǵdaılar anyqtalmady.

Nátıjesinde sot sottalýshyny kináli dep tanyp, ómir boıyna jaza kesti.

Sot úkimi ázirge zańdyq kúshine engen joq.

Buǵan deıin SQO-da qyzyna pyshaq suǵyp alǵan áıel sottalǵanyn jazǵan edik.