SQO-da «Qyzyljar jastary» arnaıy ıpotekalyq baǵdarlamasy iske qosylady

PETROPAVL. KAZINFORM — Soltústik Qazaqstan oblysynda 35 jasqa deıinge jastarǵa 6% mólsherlememen baspana alýǵa múmkindik týdy. 

«Qyzyljar jastary» jeńildikti kredıtteý baǵdarlamasyna qatysý úshin 26 mamyrdan 11 maýsymǵa deıingi aralyqta ótinim berip úlgerý qajet. 

Bul týraly óńirlik kommýnıkatsııalar qyzmetinde ótken brıfıngte aıtyldy. 

— Baǵdarlama «Qazaqstandyq turǵyn úı kompanııasy» AQ kepildigi bar salynyp jatqan obektilerde, oblys aýdandary pen Petropavl qalasynda Otbasy bank arqyly bastapqy/qaıtalama naryqta páter satyp alýǵa múmkindik beredi. Qaryzdyń eń joǵary somasy — Petropavlda 15 mln teńge, oblys aýdandarynda 10 mln teńge, bastapqy jarna — 10%, qaryz boıynsha mólsherleme — jyldyq 6%, kredıtteý merzimi 19 jylǵa deıin bolady, — deıdi Otbasy bank oblysyq fılıalynyń dırektory Nurjan Alıbekov.

Baǵdarlamaǵa densaýlyq saqtaý, veterınarııa, áleýmettik sala, mádenıet, sport, azamattyq qorǵanys jáne tótenshe jaǵdaılar, energetıkalyq sala qyzmetkerleri, tehnıkalyq jáne ákimshilik personaldy qospaǵanda, teologtar qatysa alady.

— Baǵdarlama talaptaryna toqtalar bolsam, SQO qalalary men aýdandarynyń 35 jasqa deıingi jas mamandary ótinim bere alady. Olardyń sońǵy jumys ornynda keminde 6 aı jumys ótiliniń bolýy shart. Ótinish berýshiniń jáne onymen turaqty birge turatyn otbasy músheleriniń sońǵy 5 jyl ishinde atynda baspana bolmaýy tıis. Eger qatysýshylar birdeı upaı jınasa, jasyna qaraı úlken qatysýshyǵa basymdyq beriledi, — deıdi fılıal basshysy.

SQO ishki saıasat basqarmasy basshysynyń orynbasary Kemel Ospanovtyń aıtýynsha, alǵash ret júzege asqaly otyrǵan «Qyzyljar jastary» ıpotekalyq baǵdarlamasy 2029 jylǵa deıin shaqtalǵan. Baldyq júıe boıynsha úmitkerler anyqtalady, qatysýshynyń áleýmettik mártebesi, otbasylyq jaǵdaıy, balalarynyń bolýy jáne kásibı tájirıbesi eskeriledi. 

Buǵan deıin SQO-da halyq arasyndaǵy ólimniń negizgi sebepteri aıtylǵanyn jazǵan edik.