SQO-da qyzylshany juqtyrý bıyl bes ese azaıdy

PETROPAVL. KAZINFORM — Soltústik Qazaqstan oblysynda jyl basynan beri 65 adam qyzylshamen aýyrdy.

SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, byltyr osy ýaqytta 329 naýqasqa «qyzylsha» dıagnozy qoıylǵan.

— Aýyrǵandardyń basym bóligi — Petropavl turǵyndary, 33 jaǵdaı tirkeldi. Ýálıhanov aýdanynda — 10, Qyzyljar aýdanynda — 8, Aıyrtaý aýdanynda — 5, qalǵandarynda bir-eki adamnan juqtyrdy. Qyzylsha — óte juqpaly, qaýipti vırýstyq aýrý. Asqynǵan jaǵdaıda mı qabyǵy (entsefalıt), ókpe (pnevmonııa), ortańǵy qulaq (otıt) qabynady. Keı jaǵdaıda ólimge ákelýi múmkin. Qyzylshany arnaıy emdeý ádisi joq. Aýrýdyń aldyn alýdyń jalǵyz tıimdi tásili — ýaqtyly vaktsınatsııa, — deıdi SQO sanıtarııalyq-epıdemıologııalyq baqylaý departamenti basshysynyń orynbasary Arman Kúshbasov.

Mamannyń aıtýynsha, Qazaqstanda qyzylsha, qyzamyq jáne parotıtke qarsy biriktirilgen vaktsına qoldanylady. Ol 10 jyldan astam ýaqyt boıy Ulttyq egý kúntizbesi aıasynda 1 jas jáne 6 jastaǵy balalarǵa salynyp keledi.

— Bul vaktsınadan qorqýdyń qajeti joq. Preparat ózin tıimdi ári qaýipsiz vaktsına retinde kórsetti. Bul vaktsına Dúnıejúzilik densaýlyq saqtaý uıymy tarapynan sertıfıkattalǵan, bul onyń joǵary sapa jáne qaýipsizdik standarttaryna saı ekenin dáleldeıdi. Óndirýshi — Serum Institute of India Pvt. Ltd. — álemdegi iri vaktsına jetkizýshilerdiń biri jáne ónimderin 170-ten astam elge eksporttaıdy, — deıdi Arman Kúshbasov.

Buǵan deıin Qyzylordada qyzylsha juqtyrǵandardyń 75-80% ekpe almaǵanyn jazǵan edik.