SQO-da qyzylshany juqtyrý 4,6 ese qysqardy

PETROPAVL. KAZINFORM – Soltústik Qazaqstan oblysynda byltyr 70 adam qyzylsha juqtyrdy.

SQO sanıtarııalyq-epıdemıologııalyq baqylaý departamentiniń málimetinshe, ınfektsııany juqtyrǵandardyń 33-i Petropavl turǵyny, taǵy 14 adam Ýálıhanov aýdanynda, 8 syrqat Qyzyljar aýdanynda jáne beseý Aıyrtaý aýdanynda anyqtalǵan. Qalǵandarynda 3-1 jaǵdaıdan tirkelgen.

Aýyrǵandardyń 77% - 14 jasqa deıingi balalar. 

- Qyzylsha – aýa arqyly beriledi. Vırýs sóılegen kezde túkirikpen, jótelgen, túshkirgen kezde bólinedi. Vırýstyń aýa tolqynymen ǵımarattyń ventılıatsııalyq júıesi arqyly taralǵan jaǵdaılary belgili. 

Oblysta aýyrǵandardyń 93% qyzylshaǵa qarsy ekpe almaǵan nemese ony alǵanyn rastaıtyn jazba bolmaǵan.

Vaktsınatsııalanbaǵan 5 jasqa deıigi balalarda qyzylsha jıi asqynady, tipti ólimmen de aıaqtalýy múmkin. Sondaı-aq júkti áıelderge de qaýip joǵary, - deıdi departament basshysynyń orynbasary Arman Kúshbasov. 

Mamannyń aıtýynsha, qyzylshany múlde ekpe almaǵandar nemese ekpe alsa da ımmýnıtet qalyptaspaǵan adamdar juqtyrady. 

- Inkýbatsııalyq kezeń – 21 kún. Negizgi belgisi bórtpe, onyń shyǵýynyń óz ereksheligi bar. Alǵashqy bórtpe qulaq artynda, shash arasynda, mańdaıda, murynda shyǵady. Birinshi táýliktiń sońyna qaraı moıyn men betke kóptep shyǵady, ekinshi táýlikte qoldarǵa shyǵady. Úshinshi táýlikte bórtpeler aıaqta paıda bolady. Usaq qyzǵylt daqtar tez arada úlkeıip, formasyn ózgertip, bir-birine qosylyp ketedi.

Qyzylsha asqynǵan jaǵdaıda kóp jaǵdaıda pnevmonııa, bronhıolıt, plevrıt, menıngıt, larıngıt jáne entsefalıtke ákeledi, - deıdi Arman Kúshbasov. 

Qyzylsha – qazirgi tańda eń juqpaly aýrýdyń biri bolyp esepteledi. Bul ınfektsııanyń aldyn alýdyń eń tıimdi jáne senimdi ádisi - vaktsınatsııa. 

- Qyzylshaǵa qarsy vaktsınany biz 20 jyldan artyq qoldanyp kelemiz. Ol tıimdiligin kórsetti. Ol sondaı-aq epıdemııalyq parotıt pen qyzamyqqa qarsy da egiledi. 

Eń alǵashqy vaktsınatsııany balalarǵa 12 aılyǵynda, ekinshisi 6 jasta jasalady, - deıdi Arman Kúshbasov.

Buǵan deıin Jambyl oblysynda eki aptada qyzylshanyń 191 jaǵdaıy tirkelgenin jazǵan edik.