SQO-da qysta jolda qalǵandarǵa arnalǵan 200-den astam jylytý pýnkti ashylady
PETROPAVL. KAZINFORM — Soltústik Qazaqstan oblysynda óńirlik mańyzy bar joldardy qysta kútip ustaýǵa bıyl 1,5 mlrd teńgege jýyq qarjy bólindi.
Qysy alty aıǵa sozylatyn óńir úshin joldardyń maýsymǵa ázirligi mańyzdy. Boranda trassany qar basyp, kólik qozǵalysy qıyndamaý úshin bıyl joldardy kútip-ustaýǵa 13 aýdan boıynsha 6 merdiger uıym tartylǵan.
— Qysta joldardy kútip ustaýǵa 98 arnaıy tehnıka daıyn. Qar-muzben kúresý úshin 400 tonna qum men 355 tonna tuz daıyndaldy. Butalardy kesý jáne sý ótkizý qubyrlaryn jabý jumystary júrgiziledi. Qysqy maýsymǵa tolyq daıyndyq qazan aıynyń ortasynda aıaqtalady, — deıdi SQO Jolaýshylar kóligi jáne avtomobıl joldary basqarmasynyń bas mamany Erjan Qabdýlmajıtov.
Óńirde avtomobıl joldarynyń jalpy uzyndyǵy — 8,4 myń shaqyrym. Onyń ishinde 2 myń shaqyrymy — respýblıkalyq, 2 myń shaqyrymy — oblystyq, al 4,4 myń shaqyrymy — aýdandyq mańyzdaǵy joldar. SQO elimizde jol uzyndyǵy boıynsha ekinshi orynda tur.
— Oblystyq mańyzdaǵy joldarda qysta qar kóp alatyn 131 qaýipti ýchaske bar. Olardyń jalpy uzyndyǵy 459 km. Bıyl qar ustaǵysh qalqandar ornatylyp jatyr.
Tótenshe jaǵdaılar týyndaǵan jaǵdaıda jolaýshylardyń qaýipsizdigin qamtamasyz etý maqsatynda byltyrǵydaı bıyl da 213 jylytý pýnkti daıyndalǵan. Olar jumys istep turǵan avtostantsııalar men jol mekemeleriniń ákimshilik ǵımarattarynda ornalasqan, — deıdi Erjan Qabdýlmajıtov.
Sonymen qatar, qys mezgilinde jol qozǵalysynyń qaýipsizdigin qamtamasyz etý maqsatynda, oblys ákimdigi men tıisti qyzmetterdiń birlesýimen «Qysqy kezeńde oblystyq, aýdandyq mańyzdaǵy joldarda jáne eldi mekenderdiń kóshelerinde jol qozǵalysyn shekteý boıynsha ózara is-qımyl Jol kartasy» bekitilgen.
Buǵan deıin Aqtóbede respýblıkalyq mańyzy bar joldarǵa ınertti materıaldar tasymaldanyp jatqanyn jazǵan edik.