SQO-da qysta jalpy uzyndyǵy 156 km bolatyn qaýipti 86 jol ýchaskesi bar

PETROPAVL. KAZINFORM — Soltústik Qazaqstan oblysynda ótken qysta 109 jol-kólik oqıǵasy tirkelip, 10 adam kóz jumǵan. Taǵy 153 adam túrli dene jaraqatyn alǵan.

metel, býran, zıma, zakryta doroga, boran, qys, jol jabyq
Foto: Maqsat Shaǵyrbaev / Kazinform

Bıyl qys qarsańynda polıtseıler jol qaýipsizdigin qamtamasyz etý máselesin talqylap, jaýapty mekemelerge birqatar tapsyrma berdi.

Oblystyq polıtsııa departamenti bastyǵynyń orynbasary Marat Jumalıevtiń tóraǵalyǵymen ótken jıynǵa memlekettik organdar men jolǵa jaýapty uıymdardyń ókilderi qatysty. 

Mamandardyń aıtýynsha, óńirde avtomobıl joldary men kóshelerdiń jalpy uzyndyǵy 16 myń km-ge jýyqtaıdy. Mundaı aýqymdy jol jelisin qys boıy kútip ustaý ońaı emes.

Jyl basynan beri polıtseıler jol ınfraqurylymyna 2 myńnan astam tekserý júrgizgen. Nátıjesinde anyqtalǵan kemshilikterdi joıý boıynsha 1627 nusqama berilgen.

Sonymen qatar qar qursaýynda qalý qaýpi joǵary jol ýchaskeleri de anyqtalǵan. SQO-da jalpy uzyndyǵy 156 km bolatyn 86 ýchaske bar. Endi aýdandyq polıtsııa bólimderiniń basshylary jol uıymdary jáne jergilikti atqarýshy organdarmen birlesip, osy aýmaqtardy qosymsha tekserýi tıis.

Jıynda qysqy joldardy kútip ustaýǵa qajetti tehnıkanyń sany men daıyndyǵy, joldarǵa sebiletin materıaldardyń qory, jylytý pýnktteriniń jumysy sekildi mańyzdy máseleler qaraldy.

Polıtseıler aýa raıy nasharlap, joldar jabylǵan jaǵdaıda turǵyndardy ýaqtyly habardar etý, qyzmetter arasynda aqparat almasýdy jedel uıymdastyrý, qozǵalysqa shekteý qoıý jáne avtomobıl joldaryn jabý kezinde is-qımyldardy úılestirý qajettigin atap ótti.

Buǵan deıin Almaty qalasynyń qysqa daıyndyǵy týraly jazǵan edik.