SQO-da qysta demalysty qaıda ótkizýge bolady
PETROPAVL. KAZINFORM – Jańa jylǵa oraı beriletin demalys kúnderin teledıdar aldynda emes, qystyń qyzyǵyna batyp, kóńildi ári densaýlyqqa paıdaly ótkizýge bolady.
Soltústik Qazaqstan oblysynda qysqy demalys oryndarynyń sany artyp keledi. SQO kásipkerlik jáne ındýstrııalyq-ınnovatsııalyq damý basqarmasynyń málimetinshe, óńirdegi basty týrıstik baǵyttardyń biri – Imantaý-Shalqar kýrorttyq aımaǵy. Qazir munda 50-ge jýyq demalys bazasy bolsa, sonyń 10-y qonaqtardy qysta da qabyldaýǵa ázir.
- Máselen, «Solnechnoe Vıp» demalys aımaǵy jyl boıy emdeý-saýyqtyrý qyzmetin kórsetedi. Onyń ishinde panta qosylǵan vanna, pantaly bóshke, fıtobóshke, galokamera sııaqty birneshe em túrleri kiredi. Sonymen qatar shańǵy tebýge jáne qalyń qaraǵaıly ormanda serýendeýge múmkindik bar. Monsha men saýna jumys isteıdi. Qysta balyq aýlaýdy unatatyndar úshin Shalqar jáne Imantaý kólderinde «Izýmrýdnoe», «Turpan», «Dom ý ozera», «Adam», «Adel», «Qazyǵurt», «Imantaý», «Zarıa» demalys bazalary jáne «Zeınep» kópsalaly kolledji qyzmet kórsetedi. Demalys oryndarynyń aýmaǵynda monsha bar, shańǵy men konkı, tıýbıngter, aerosanalar, kvadrotsıklder jalǵa beriledi. Bul demalys bazalary 400-den astam qonaqty qabyldaı alady, - deıdi basqarma basshysy Darhan Ámrın.
Mamannyń aıtýynsha, kólder «Kókshetaý» tabıǵı parki aýmaǵynda ornalasqan, sondyqtan tek joldama bolǵan jaǵdaıda ǵana balyq aýlaýǵa bolady. Al joldamany easyfishing.kz saıtynan onlaın túrde satyp alýǵa bolady.
Sondaı-aq, Esil aýdanyndaǵy Úlken Torańǵul kóli de qysta balyq aýlaýǵa qolaıly tanymal kólderdiń biri.
Petropavl mańyndaǵy Qarǵaly aralyndaǵy burynǵy «Volna» balalar lageriniń aýmaǵynda sporttyq qural-jabdyqtardy - shańǵy men tıýbıngti jalǵa alý múmkindigi bar.
- Bul keshen oblys ortalyǵyna jaqyn bolǵandyqtan turǵyndar men qonaqtar arasynda suranysqa ıe. Osyǵan oraı qazir 500 oryndyq sanatorıı-kýrorttyq keshenniń qurylysy júrip jatyr. Investor 12 jyl boıy jumys isteıtin barnhaýs úılerin, demalýshylar men qonaqtarǵa arnalǵan dámhanany, on shaqty besedkany iske qosty. Qala mańyndaǵy taǵy bir otbasylyq demalys kesheni - «Green park» park-oteli. Park aýmaǵynda premıým-sanattaǵy úıler bar. Kvadro-monsha, karaokesi bar saýyqtyrý monshasy, kýpel, mangal aımaǵy, sondaı-aq jylytylatyn basseın jumys isteıdi. Qysta syrǵanaq tebýge, tıýbıng jalǵa alýǵa, qar kóligimen, ponımen, «bananmen» jáne haskı ıtteri jegilgen shanalarymen serýendeýge bolady, - deıdi basqarma basshysy.
Petropavlda jańa jylǵa oraı bıyl «qysqy ertegi» stılinde jańajyldyq 10 negizgi alań paıda boldy. Birneshe syrǵanaqtar salyndy. Bıyl alǵash ret jaıaý júrginshiler kóshesindegi ortalyq alańda úlken muzaıdyny quıyldy.
Petropavldaǵy Borkı kentindegi shańǵy bazasy aýmaǵynda shańǵyny jalǵa alyp, tebýge bolady. Jeke kásipkerdiń aıtýynsha, byltyrǵy baǵalar saqtalǵan, ıaǵnı eresekter úshin 2 myń teńge, balalarǵa 1 myń teńge tóleý qajet.
Al Esil ózeniniń jaǵasynda taý shańǵysyn tebýge bolady. «Petrogorkı» demalys bazasynyń málimetinshe, taý shańǵysyn, aıaq kıimin jaı kúnderi jalǵa saǵatyna 2,5 myń teńgege, bir kúnge 7 myń teńgege alýǵa bolady. Demalys, mereke kúnderi baǵa 1-2 myń teńgege qymbat.
Kótergishtiń qyzmetin paıdalaný saǵaty – 4 myń teńge bolsa, bir kúndik baǵasy – 8 myń teńgege baǵalanǵan.
Vınokýrov sport saraıynda da muzaıdyny jumys istep jatyr. Kirý bıleti eresekter úshin 1 myń teńge tursa, 14 jasqa deıingi balalar 600 teńge tóleıdi. Konkıdi jalǵa alý quny da osy aralyqta.
Budan bólek eldi mekenderde ashyq, jabyq hokkeı korttary jumys istemek.
Buǵan deıin SQO-da eldi mekender arasynda úılerin jańajyldyq bezendirýden baıqaý ótip jatqanyn jazǵan edik.