SQO-da kishkentaı eki bala ystan ýlanyp, aýrýhanaǵa tústi

PETROPAVL. QazAqparat – Petropavlda ótken aptada órtten úsh adam qaza tapty, onyń úsheýi de - turaqty mekenjaıy joq qańǵybastar, dep habarlaıdy QazAqparat tilshisi.

Soltústik Qazaqstan oblysy tótenshe jaǵdaılar departamenti aptalyq brıfıng ótkizip, ótken aptada bolǵan oqıǵalarǵa toqtaldy.

Máselen ótken aptada 21 órt tirkelip, úsh adam mert boldy, eki adam kúıik alyp, eki bala ıis tıip ýlanyp qaldy.

5 qarasha kúni saǵat 20.11 mınýt ketkende Petropavldaǵy Vasılev 123 mekenjaıynda ornalasqan jylý kollektorynan órt shyqqan.

Órt sóndirýshiler nysannyń ishinen 36 jastaǵy adamnyń denesin alyp shyqty. 28 jastaǵy er adam 79 % kúıik alyp, úsh kúnnen keıin jansaqtaý bólimshesinde qaıtys boldy.

Al úshinshi 44 jastaǵy er adamnyń denesiniń 12 %-y kúıgen. Órt maıshamnan shyqqan, saldarynan tósek-oryn órtenipti. Qańǵybastardyń úsheýi de mas bolǵan.

Osyǵan uqsas oqıǵa kelesi kúni 6 qarashada boldy. Petropavldaǵy Medvedev 10 mekenjaıynda ornalasqan jylý kollektorynda órt shyqqany jóninde habar arnaıy qyzmetke saǵat 17.00 shamasynda túsken.

Qutqarýshylar janyp jatqan kollektordan eki adamdy shyǵardy. Áıel 75 % kúıik alyp, eki kúnnen keıin jansaqtaý bólimshesinde kóz jumdy.

Qasynda bolǵan er adam da kúıik aldy. Olar da mas bolǵan. Órt temeki tuqylynan shyqqan.

Osy kúni Qyzyljar aýdany Beskól aýylyndaǵy Baýkenov, 9 kóshesindegi turǵyn úıde eki bala ıis tıip, ýlanyp qaldy.

Mamandardyń aıtýynsha, peshtiń murjasy bitelip qalǵan. Saldarynan 7 jáne 5 jastaǵy eki bala ýlanyp, oblystyq balalar aýrýhanasyna jetkizildi.

Aǵaly-qaryndasty ekeýiniń jaǵdaıy birqalypty.