SQO-da qys mezgilinde joldardy durys kútip ustamaǵan 51 laýazymdy tulǵa jazalandy
PETROPAVL. KAZINFORM – Soltústik Qazaqstan oblysynda joldardy qardan durys tazartpaı, mindetine júrdim-bardym qaraǵandar jazalanyp jatyr. Buǵan turǵyndardyń joldyń sapasyna qatysty kóptegen shaǵymy sebep bolǵan.
Bıyl SQO-ǵa jyldaǵydan qar qalyń tústi. Jeltoqsan aıynda jaýǵan jańbyr joldardaǵy jaǵdaıdy ýshyqtyryp jiberdi. Qatqan muz kólikti shyr aınaldyryp, joldan laqtyryp jiberedi. Zardap shekken turǵyndar bul týraly áleýmettik jelide jazyp ta, aıtyp ta jatyr.
SQO polıtsııa departamenti baspasóz qyzmetiniń málimetinshe, polıtsııa qyzmetkerleri joldarǵa kúsheıtilgen túrde tekserýler júrgizip, adamdardyń aryz-shaǵymdaryna qatysty sharalar qabyldap jatyr. Áleýmettik jelilerge monıtorıng júrgizý barysynda problemalyq ýchaskeler anyqtalǵan.
Osylaısha qańtar aıynda avtomobıl joldaryna jáne kóshe-jol jelisine 2,5 myń shaqyrymdy qamtıtyn 241 tekserý júrgizildi. Jol qozǵalysynyń qaýipsizdigine teris áser etetin 348 kemshilik anyqtaldy, 51 laýazymdy tulǵa ákimshilik jaýapkershilikke tartyldy.
«Polıtseılerdiń maqsaty – jazalaý emes. Jol qaýipsizdigin nyǵaıtý úshin múddeli organdarmen tyǵyz qarym-qatynas jasaý. Barlyq baǵyttaǵy joldardy jabý tájirıbesin keńinen qoldaný týraly sheshim qabyldandy. Borandy kúni arnaıy tehnıkany josparly túrde joldardy tazalaýǵa jiberýdiń ornyna omby qarda batyp qalǵan kólikterdi shyǵarýǵa qoldanýǵa týra keledi. Budan bólek, jedel járdem sııaqty shuǵyl qyzmetterdiń avtokólikterine jol ashyp berý úshin de qosymsha rezerv qajet. Aýdandyq polıtsııa bólimderine jol apattary týyndaýy múmkin qaýipti ýchaskelerde jyldamdyqty ýaqytsha tómendetý jáne qar tazalaý jumystaryn turaqty baqylaýǵa alý týraly tapsyrma berildi», – deıdi SQO PD ákimshilik polıtsııa basqarmasynyń bastyǵy Serik Áljanov.
Osy máselege qatysty polıtsııa jergilikti atqarýshy organdarmen jáne joldardy kútip ustaýǵa jaýapty merdiger uıymdarmen kezekti kezdesý ótkizdi. Aýdandyq polıtsııa bólimderindegi jol-tehnıkalyq ınspektsııasy toptarynyń jetekshileri onlaın rejımde qatysty. Kezdesýde aýa-raıynyń nasharlaýy kezindegi ózara is-qımyl tártibi sııaqty máseleler talqylandy.
