SQO-da qys qarsańynda 4 myń shaqyrym jol tekserilip, birqatar kemshilik anyqtaldy
PETROPAVL. KAZINFORM – Soltústik Qazaqstan oblysynda joldardy qysqy kútip-ustaýǵa arnalǵan avtotehnıkanyń qaralymy ótti.
SQO polıtsııa departamenti baspasóz qyzmetiniń málimetinshe, is-shara barysynda QazAvtoJol jáne «KAJservıs» JShS oblystyq fılıaldarynyń avtoparki tanystyryldy. Qazirgi tańda óńirdegi avtojoldardyń jalpy uzyndyǵy 9 myń km jýyq, onyń 2 myń shaqyrymy — oblystyq jáne 5 myń shaqyrymy — aýdandyq mańyzǵa ıe. Aımaqta 6 jol-paıdalaný ýchaskesi jumys isteıdi.
Qys maýsymy qarsańynda polıtseıler dástúrli túrde óńir joldarynyń jaǵdaıyn tekserdi. Tártip saqshylarynyń aıtýynsha, búginge deıin respýblıkalyq jáne oblystyq mańyzy bar shamamen 4 myń shaqyrym jol qaraldy. Nátıjesinde anyqtalǵan kemshilikterdi joıý boıynsha 48 uıǵarym engizildi.
Jalpy jyl basynan beri SQO-da adamdardyń jaraqattanýymen baılanysty 430 jol-kólik oqıǵasy tirkeldi. Onyń 84-i respýblıkalyq mańyzdaǵy joldarda bolǵan. Saldarynan 21 adam kóz jumdy, 147 adam túrli jaraqat aldy.
— Sınoptıkterdiń boljamy boıynsha aldaǵy kúnderi kún sýytyp, qar aralas jańbyr jaýmaq. Osyǵan oraı júrgizýshilerdi kólik dóńgelekterin ýaqytyly qysqyǵa aýystyryp, kóktaıǵaqqa daıyn bolýǵa shaqyramyz. Jol apattarynyń aldyn alýdyń eń tıimdi tásili — saqtyq tanytyp, jol qozǵalysy erejelerin qatań saqtaý, — deıdi polıtseıler.
Buǵan deıin SQO joldarynda qansha qaýipti ýchaske bar ekenin jazǵan edik. Bıyl respýblıkalyq trassalarǵa qar bógeıtin qalqandar ornatylyp jatyr.