SQO-da qyrkúıekte kún raıy qandaı bolady
PETROPAVL. KAZINFORM - Soltústik Qazaqstan oblysynda qyrkúıek aıynda aýa raıy qubylmaly bolyp, ekinshi onkúndikte alǵashqy úsik túsýi múmkin.
Astyqty óńir úshin qyrkúıek aıyndaǵy aýa raıy asa mańyzdy. Jaz boıy eńbektengen dıqandar kúzde ónimdi jınaýǵa kirisedi. Jaýyn-shashynsyz bolsa, astyqty ysyrapsyz jınap alý múmkindigi artady.
«Qazgıdromet» respýblıkalyq kásiporny oblystyq fılıalynyń málimetinshe, qyrkúıekte aılyq ortasha aýa temperatýra +10,2…+11,7°C shamasynda bolady. Bul kórsetkish jalpy alǵanda klımattyq normaǵa jaqyn. Qyrkúıek aıynyń qalypty ortasha temperatýrasy +10,7…+11,6°C aralyǵynda.
- Aıdyń alǵashqy kúnderinde óńirde jazdyń jyly lebi sezilýi múmkin. Alaıda onkúndik ishinde aýa temperatýrasy birtindep tómendeıdi. bastapqyda túngi temperatýra +11…+17°C, kúndiz +28°C-qa deıin kóterilýi yqtımal. Keıin aýa raıy salqyndap, kúndizgi temperatýra +13…+18°C, jaqyndaıdy, - deıdi oblystyq fılıal dırektory Qymbat Merǵalımova.
Mamannyń aıtýynsha, aıdyń ekinshi onkúndiginde túnde temperatýra +1…+6°C-qa deıin tómendep, topyraq betinde 2°C-qa deıin úsik bolýy yqtımal. Kúndiz synap baǵanasy +13…+18°C deıin joǵarylamaq.
Keıin kún qaıta jylynýy múmkin. Túngi temperatýra +6…+11°C bolsa, al kúndiz +18…+23°C deıin jylynady.
Sondaı-aq naızaǵaı, shańdy daýyl jáne daýyl sııaqty qaýipti meteorologııalyq qubylystar bolýy múmkin. Jeldiń ekpini keı kezderi 15–20 m/s-qa deıin jetedi.
Qyrkúıektiń úshinshi onkúndiginiń basynda aýa temperatýrasy taǵy da tómendeıdi. Túnde +1…+6°C, al oblystyń batysy men soltústiginde 2°C-qa deıin úsik bolýy yqtımal. Kúndiz aýa temperatýrasy +8…+13°C shamasynda bolady.
Keıin temperatýra qaıtadan qubylyp, túnde +1…+6°C-tan +6…+11°C-qa deıin, al kúndiz +8…+13°C-tan +14…+19°C-qa deıin kóterilýi múmkin.
Qyrkúıek aıynda oblys boıynsha jaýyn-shashyn mólsheri shamamen klımattyq normaǵa saı, keı jerlerde normadan joǵary bolýy múmkin. Aılyq norma 22–34 mm aralyǵynda.
Jaýyn-shashyn ásirese aıdyń ekinshi jartysynda jıi ári birkelki emes túsýi yqtımal. Sondyqtan qyrkúıek boıy kún ashyq ári jyly kezeńdermen qatar jańbyrly jáne salqyn kúnder de almasyp otyrady.
Buǵan deıin Shyǵys Qazaqstan oblysynda qyrkúıek aıynyń basynda aýa raıy ystyq bolatynyn jazǵan edik.
