SQO-da qyrylǵan úı qustary úshin ótemaqy berile me — ákim jaýaby

ASTANA. KAZINFORM — Soltústik Qazaqstan oblysynyń ákimi Ǵaýez Nurmuhambetov Qyzyljar aýdanynda 7 myńǵa jýyq úı qusynyń qyrylýy jóninde pikir bildirdi. Elordada Ortalyq kommýnıkatsııalar qyzmetinde tilshiler qusy qyrylǵan sharýalarǵa ótemaqy berile me degen suraq qoıdy.

Óz jaýabynda ákim 21 aýlada 7236 qustyń qyrylǵany aıtty, olardyń basym bóligi — qazdar (98%). Sondaı-aq kúrketaýyqtar, úırekter jáne basqa da úı qustary bar.

— Veterınarııa týraly zańǵa sáıkes, qustardy Ulttyq referenttik ortalyqqa tapsyramyz. Búgin pasterellez dıagnozy qoıyldy. Qazir aýylda oblystyń epızootııaǵa qarsy qyzmet jasaǵy jumys istep jatyr. Qajetti sharalar júrgizilip, qyrylǵan qustyń shamamen 90%-y joıyldy, — dedi Ǵ. Nurmuhambetov.

Onyń aıtýynsha, pasterellez dıagnozy qoıylǵan jaǵdaıda ótemaqy qarastyrylmaǵan.

— Biraq bizdiń tájirıbemizde buǵan uqsas jaǵdaı Býgrovoe aýylynda da bolǵan. Sol kezde aýdan ákimine taýar óndirýshilermen birlesip, qarjylyq qarajat kózin tabý tapsyryldy. Sol aýyldaǵydaı, pasterellez dıagnozy rastalǵan jaǵdaıda qustyń qunynyń keminde 50%-yn óteý múmkindigi qarastyrylyp jatyr, — dedi oblys ákimi. 

Eske sala ketsek, SQO Shahovskoe aýylynda 7 myńǵa jýyq qus qyryldy.