SQO-da qyryqtan astam sý aıdynyn sanıtar dárigerler baqylaýǵa alǵan
PETROPAVL. KAZINFORM — Soltústik Qazaqstan oblysynyń sanıtarııalyq-epıdemıologııalyq baqylaý departamenti turǵyndar jıi demalýǵa baratyn 47 sý aıdynyn baqylaýǵa alǵan.
Vedomstvonyń baspasóz qyzmeti málimetinshe, byltyrǵy sý tasqynyna baılanysty demalys oryndarynyń beseýi búginde toqtap tur. Olar: Qyzyljar aýdany Abakshınodaǵy 4 demalys bazasy jáne Petropavldyń Esil ózeniniń jaǵasyndaǵy qalalyq jaǵajaı.
Sanıtar dárigerler sý aıdyndarynyń jaǵdaıyna sanıtarııalyq-epıdemıologııalyq monıtorıng júrgizip, barlyǵy 338 sý synamasy alynyp, zertteldi. Onyń ishinde mıkrobıologııalyq, sanıtarııalyq-hımııalyq, vırýsologııalyq zertteýlerge, parazıtologııalyq kórsetkishterge, jáne tyrysqaq vıbrıonyna synama alyndy.
Zertteý nátıjeleri boıynsha, turǵyndar demalatyn sý aıdyndary qaýipsiz, standartqa saı kelmeıtin sý synamalary anyqtalǵan joq.
— Aýmaqtyq basqarmalarmen kásipkerlik sýbektilerimen kezdesýler uıymdastyrylyp, halyqtyń jazǵy demalys jáne qoǵamdyq tamaqtaný oryndaryn daıyndaý, sondaı-aq, sý aıdyndaryndaǵy halyqtyń jappaı demalatyn oryndarynda sanıtarııalyq erejeler talaptaryn saqtaý boıynsha jumys júrgizildi. Sý aıdyndarynyń sapasy shomylý maýsymy aıaqtalǵanǵa deıin baqylaýda bolady, — deıdi departament mamandary.
Buǵan deıin Qazaqstannyń Tótenshe jaǵdaılar mınıstrligi jaz mezgili qarsańynda balalardyń qaýipsizdigin qamtamasyz etýge baǵyttalǵan keshendi sharalardy júzege asyryp jatqanyn jazǵan edik.