SQO-da qyryq jyldan artyq qujatsyz júrgen 38 adam bıyl jeke kýálik aldy
PETROPAVL. KAZINFORM — Qazirgi ýaqytta óńirde qujatsyz júrgen taǵy 75 adamnyń máselesin sheshý maqsatynda materıaldar jınalyp jatyr.
Soltústik Qazaqstan oblysy polıtsııa departamenti baspasóz qyzmetiniń málimetinshe, qujatsyz júrýge ártúrli sebep bolýy múmkin. Bul árdaıym jaýapsyzdyqtyń nemese nemquraılylyqtyń saldary emes.
Máselen, Maǵjan Jumabaev aýdanynyń 61 jastaǵy turǵyny 1980-jyldary ásker qatarynda qyzmet etip, sol jerde júrgizýshi mamandyǵyn meńgergen. Keıin ómir boıy avtobýs pen júk kólikterin júrgizip, túrli kásiporyndarda eńbek etken. Biraq ómirlik jaǵdaılarǵa baılanysty Qazaqstan Respýblıkasynyń qujattaryn ala almaǵan.
Sońǵy jyldary ol kezdeısoq tabysqa kún kórýge májbúr bolǵan. Endi jeke kýálik alǵannan keıin resmı jumysqa ornalasyp, medıtsınalyq qyzmetter men áleýmettik jeńildikterdi paıdalana alady.
Maǵjan Jumabaev aýdanynda polıtseıler jeke basyn kýálandyratyn qujattary joq azamattardy anyqtap, olardy qujattandyrý boıynsha aýqymdy jumys júrgizdi.
Aldymen qajetti málimetterdi ýchaskelik polıtsııa ınspektorlary jınady. Sonymen qatar SQO polıtsııa departamenti kóshi-qon qyzmeti basqarmasynyń qyzmetkerleri de eldi mekenderge baryp, tıisti jumystar atqardy.
Árbir jaǵdaı boıynsha quzyrly organdarǵa, sonyń ishinde jaqyn jáne alys shetelderdiń tıisti mekemelerine suraý salyndy. Turǵyndardyń basqa memlekettiń azamaty emestigi tekserilip, rastaldy.
Aýdandyq polıtsııa bóliminiń bastyǵy Asan Meıramovtyń aıtýynsha, qazir aýdanda 8 adam 1974 jylǵy úlgidegi tólqujattaryn Qazaqstan Respýblıkasy azamatynyń qujattaryna aýystyrǵan nemese alǵash ret jeke kýálik alǵan.
Kóshi-qon qyzmetiniń mamandary azamattyqty anyqtaý jáne rastaý úshin kóptegen tekserý júrgiziletinin atap ótti. Soǵan qaramastan, bul qyzmet túri azamattarǵa tegin kórsetiledi.
Buǵan deıin Shyǵys Qazaqstan oblysynda 6 adam qos azamattyqpen júrgenin jazǵan edik.
