SQO-da qylmystyq topqa qamqorlyq jasaǵan polıtsııa maıory sottaldy

PETROPAVL. KAZINFORM – Soltústik Qazaqstan oblysy Polıtsııa departamenti uıymdasqan qylmysqa qarsy kúres basqarmasy basshysynyń eks-orynbasary 8 jylǵa sottaldy.

SQO sotynyń málimetinshe, maıor sheshindegi Erbolat Qaptaevqa uıymdasqan qylmystyq topqa qamqorlyq jasady jáne birneshe ret para aldy degen aıyp taǵyldy.

2022 jyldan ol R.Naǵumanov esimdi buryn sottalǵanmen jaqsy aralasyp, óz qamqorlyǵyna alady, birneshe ret jaýapkershilikten jaltarýǵa kómektesedi.

Naǵumanov buǵan deıin alaıaqtyq jasaǵany úshin, uıymdasqan qylmystyq top quramynda qylmys jasaǵany úshin isti bolǵan. Qaptaevpen jaqsy aralasyp, aldaǵy tintý jaıynda polıtsııadaǵy «dosynan» bilip otyrǵan.

Tergeý barysynda maıordyń para retinde uıaly telefon, Haval kóligin alǵany belgili boldy. Al byltyr Naǵumanov ustalyp, Qaptaevqa qarsy kýálik etti. Biraq keıin ol qysymmen aıtqanyn málimdedi.

Erbolat Qaptaev óz kinásin moıyndaǵan joq. Nátıjesinde burynǵy polıtsııa maıory kináli dep tanylyp, 8 jylǵa bas bostandyǵynan aıyrý jazasy kesildi jáne maıor sheninen aıyrdy. Qaptaev qylmystyq atqarý júıesiniń orta qaýipsizdik mekemesinde jazasyn óteıdi.

Úkim zańdy kúshine engen joq.

Buǵan deıin Petropavlda sorǵy stantsııasyn jóndeýge arnalǵan qarajatty jymqyrǵan basshy jazasyn alǵanyn jazǵan edik.