SQO-da keıbir kásiporyndar eki jyldan beri jalaqy tólemegen
PETROPAVL. QazAqparat - Soltústik Qazaqstan oblysynyń memlekettik eńbek ınspektsııasy basqarmasy 2017 jyldyń qorytyndylaryn shyǵardy, dep habarlaıdy «QazAqparat» HAA tilshisi.
«Oblys aýmaǵynda eki jyldan astam ýaqyttan beri jalaqy tóleý boıynsha qaryzyn ótemeı kele jatqan eki kásiporyn bar. Jambyl aýdanyndaǵy «Qaırankól Astyq» JShS 35 jumysshysyna 13,3 mıllıon teńge qaryz, al «Nıkolaevskoe HPP» JShS 25 jumysshyǵa 2,6 mıllıon teńge tóleýi tıis», - deıdi vedomstvonyń basshysy Qaırat Pishenbaev.
Onyń sózine qaraǵanda, 2017 jyly jalaqynyń der kezinde berilýi boıynsha 25 uıymda júrgizilgen tekserister kezinde olardyń jalpy 332,7 mıllıon teńge qaryzy bar ekeni anyqtalǵan. Jalaqydan qaryzy bar uıymdar ákimshilik jaýapqa tartylyp, jalpy 6,2 mıllıon teńge aıyppul salyndy.
Óńirde 2017 jyly 53 óndiristik jazataıym oqıǵa bolyp, 56 adam zardap shekken, al 9 adamnyń ómiri qıylǵan.
Eńbekti qorǵaý qaýipsizdigi salasynda jumysshylardy oqytýdy uıymdastyrý, qaýipsiz eńbek jaǵdaılaryn jasaý boıynsha erejebuzýshylyqtar jıi kezdesedi.
«Jumys berýshilerge jalpy 311 eskertý berildi, 179 laýazymdy jáne zańdy tulǵa ákimshilik jaýapqa tartylyp, jalpy 31 mıllıon teńge mólsherinde aıyppul salyndy», - deıdi Q. Pishenbaev.
