SQO-da keıbir eldi mekenderdi sý basýy múmkin - sınoptıkter
PETROPAVL. QazAqparat - Soltústik Qazaqstan oblysynyń sınoptıkteri ylǵaldyń mólsherin baqylaý derekteri arqyly jasalǵan gıdrologııalyq boljamdaryn jarııalady, dep habarlaıdy QazAqparat tilshisi.
«Qazgıdromet» RMK fılıalynyń aqparatyna súıensek, jınalǵan ylǵal mólsherin, tońnyń qalyńdyǵyn, Aqmola jáne Soltústik Qazaqstan oblystarynyń sý qoımalaryndaǵy sý deńgeıin taldaý nátıjeleri kóktem erte shyqsa óńirdegi eldi mekender, ónerkásip jáne ınfraqurylym nysandary sý astynda qalýy múmkindigin kórsetedi.
«Bıyl qysta qar qalyń boldy. Bizdiń oblysta jazyqtaǵy ózenderdiń alabyna jınalǵan ylǵal mólsheri normadan 20-70% artyq. Naýryz aıy keldi, biraq qar toqtaǵan joq. Naýryz-sáýir aılarynda jaýyn-shashynnyń aılyq mólsheri bir táýlikte jaýýy da múmkin. Naýryz aıynyń aýa raıy boljamyna sáıkes, oblys aýmaǵynyń basym bóliginde aýa temperatýrasy men jaýyn-shashyn mólsheri klımattyq normadan joǵary bolýy yqtımal», - deıdi fılıal basshysynyń orynbasary Natalıa Levına.
Sınoptıkterdiń aıtýynsha, Qaraǵandy, Aqmola, Soltústik Qazaqstan oblystaryndaǵy ózenderdiń alabynda kúzdigúni topyraqtyń ylǵaldanýy normadan 50-90% asty. Sondyqtan toń bir aıda ortasha 15 santımetrge qalyńdap, 1,5 metrge deıin jetti.
Mamandardyń aıtýynsha, bul sýdyń topyraqqa sińýine kedergi jasap, ózenderdiń arnasynan tasýyna sebep bolady.
N. Levına naýryz-sáýir aılarynda tsıklondar men antıtsıklondar jıi almasyp otyrýy jáne ońtústikten keletin jyly aýa men soltústikten keletin sýyq aýa massalary aýa raıyn kúrt ózgertetinin aıtady.
Olesıa Jýkoven
