SQO-da keı janar-jaǵarmaı beketterinde AI-95 benzıni talonmen satylyp jatyr

PETROPAVL. KAZINFORM — Soltústik Qazaqstan oblysynda AI-95 markaly benzın keı janar-jaǵarmaı beketterinde arnaıy karta jáne talonmen satylyp jat

SQO kásipkerlik jáne ındýstrııaly-ınnovatsııalyq basqarmasynyń málimetinshe, bul — ýaqytsha másele. Jaqynda óńirge suıyq otyn jetkilikti deńgeıde ákelinip, jaǵdaı qalypqa túsedi.

— Qazirgi ýaqytta SQO-da AI-95 markaly benzınniń 17 kúnge jetetin qory bar. Lıtriniń baǵasy — 262 -279 teńge. Ol Qazaq Oil, Helios jáne Shelf kompanııalarynyń janar-jaǵarmaı beketterinde esh kedergisiz satylyp jatyr. Al Petropavldaǵy «Etalon Avto» jelisiniń úsh beketinde benzın tek talon jáne arnaıy kartamen ǵana quıylyp jatyr. Qajetti benzın jolda. Mundaı jaǵdaı «Trassa» jelisiniń beketterinde de tirkelgen. Bul kompanııa jetkizý týraly kelisimge otyrysymen-aq másele sheshiledi, — dedi basqarma basshysy Darhan Ámrın.

Qazir óńirde AI-92 benzıniniń 11 kúndik qory bar, ol 218-225 teńge aralyǵynda satylyp jatyr.

Dızel otynynyń qory 13 kúnge jetedi. Lıtri — 315-323 teńgeden.

— Alańdaýǵa negiz joq. Oblysta janar-jaǵarmaı qoryna monıtorıng jasaý jáne qajetti kólemdi ýaqtyly bólý maqsatynda jedel shtab jumys isteıdi. Onyń quramyna oblys ákiminiń orynbasary jáne jergilikti atqarýshy organdardyń basshylary kiredi. Qajet bolǵan jaǵdaıda, másele ortalyq memlekettik organdarmen birlesip qaralady, — dedi Darhan Ámrın.

Búgingi tańda SQO aýmaǵynda 114 janarmaı quıý stantsııasy jumys isteıdi. Onyń 39-y — Petropavlda, 75-i — aýdandarda, onyń ishinde 24 shaǵyn beket aýyldyq jerlerde ornalasqan.

Buǵan deıin Energetıka mınıstrligi benzın máselesin baqylaýda ustap otyrǵanyn jazǵan edik.