SQO-da keı mektepterde jóndeý jumystary kesheýildep jatyr
Petropavl qalasynyń ákimi Serik Muhamedıevtiń aıtýynsha, mektepterdi jóndeý boıynsha keste bar. Alaıda keı merdigerler osy kesteden qalyp jatyr.
«№31 mektepte nysannyń shatyry men qasbetin qalypqa keltirý jumystary merziminen kesh qaldy. Ýchaskede 17 adam jumys isteıdi. Kelisimshartqa sáıkes kompanııa úlgermeı jatsa, eki kezekti jumysty uıymdastyrýy tıis. Bilim bóliminiń mamandary tıisti hatty merdigerge jiberdi. Oryndalýyn ózim tekserýdi sheshtim. Biraq nysanda nebári 10 adam eńbektenip júr. Merdigerlik uıymnyń basshysyna tez arada jumysshylardy kóbeıtip, kún saıyn atqarylýy tıis jumystyń kestesin berýdi tapsyrdym. Jóndeýdi qysqa merzimde aıaqtaý qajet. Tapsyrmanyń oryndalýyn ózim qadaǵalaıtyn bolamyn», - dep jazdy áleýmettik jelide Serik Muhamedıev.
Ákimniń aıtýynsha, oqý jylynyń jaqyndaýyna oraı bilim berý uıymdaryndaǵy jóndeý jumystarynyń óz máresine jetetin ýaqyty jaqyndap qaldy. Kúrdeli jóndeý jumystarynan keıin muǵalimder óz jumys oryndaryn retke keltirip alýy tıis. Sondaı-aq oqýshylar sabaqqa kelmes buryn hımııalyq zattardyń, ıaǵnı syr, boıaý men boıaý ezgishterdiń ıisi shyǵýy kerek.
Jalpy SQO-da bıyl 39 bilim berý nysanynda 3,8 mlrd teńge somasyna kúrdeli jóndeý júrgizilýi tıis. Oblystyq Bilim basqarmasynyń málimetinshe, apattyq mektepterdi joıý boıynsha jumys jalǵasqan.
Taıynsha aýdanynda 720 orynǵa arnalǵan 2 mektep qurylysy júrip jatyr Alda Dragomırovka eldi mekeninde 120 orynǵa arnalǵan mektep qurylysy josparlanǵan. Oblys ortalyǵynyń mektepterindegi oryn tapshylyǵyn qysqartý maqsatynda 2026 jylǵa deıin 3,3 myń orynǵa arnalǵan 4 jańa mektep salynady.
Mektepterdiń materıaldyq-tehnıkalyq bazasyn kúsheıtý jóninde jumys ta jalǵasqan. Byltyr 150 mln teńgege 28 fızıka jáne bıologııa pándik kabınetteri satyp alynsa, bıyl olardyń qatary 28 kabınetpen tolyǵady.
