SQO-da keı kókónis baǵasy ózgerdi

PETROPAVL. KAZINFORM – Soltústik Qazaqstan oblysynda sáýirde ınflıatsııa deńgeıi jyldyq eseppen 10,6 % boldy. 

Ulttyq statıstıka bıýrosy oblystyq departamentiniń málimetinshe, azyq-túlik taýarlary 9%, azyq-túlikke jatpaıtyn taýarlar 11%, al halyqqa kórsetiletin aqyly qyzmetter 12% qymbattaǵan.

Baǵanyń bir jyl ishinde edáýir óskeni azyq-túlik ónimderinen baıqaldy. Atap aıtqanda, balyq jáne teńiz ónimderi 16%, tuzdalmaǵan sary maı, temeki ónimderi 15%, kondıterlik ónimder, alkogolsiz sýsyndar 14%, súzbe 13,5%, et 10,5 %, shujyq ónimderi 10%, alkogoldi ishimdikter 9%, jas jemister 8%, sút ónimderi 4%, qant 2,5% ósken.

Sonymen qatar, jas kókónister baǵasy da aıtarlyqtaı kóterilgen: pııaz 98%, qyryqqabat 72%, kartop 69%, qyzylsha 23%, qyzanaq 22% qymbattaǵan.

Azyq-túlikke jatpaıtyn taýarlar arasynda oıynshyqtar 22%, kıim men aıaq kıim 12%, jeke tutynýǵa arnalǵan taýarlar men quraldar 8%, farmatsevtıkalyq ónimder 5%, jýý jáne tazalaý quraldary 3% ósken.

Energııa resýrstary da qymbattady: benzın, dızel otyny 3%, al bólý júıeleri arqyly tasymaldanatyn gaz tarıfi 17% artty.

Aqyly qyzmetter salasynda da aıtarlyqtaı ósim tirkelgen. Jeke kólik quraldaryna tehnıkalyq qyzmet kórsetý men jóndeý 26%, shashtaraz jáne sulýlyq salondary qyzmetteri 18%, ınternetke qosylý abonenttik tólemi 13%, qoǵamdyq tamaqtaný qyzmetteri 10%, turǵyn úıdi jóndeý jáne qyzmet kórsetý 6%, turǵyn úıdi jalǵa alý aqysy 11 %, avtomobılmen jolaýshy tasymaldaý qyzmetteri 4% ósken.

Buǵan deıin Qazaqstanda múıizdi iri qara jáne usaq mal qansha turatynyn jazǵan edik.