SQO-da kene shaqqandar sany jyldaǵydan kóp, dárigerler qaýipsizdik sharalaryn eske saldy
PETROPAVL. KAZINFORM — Soltústik Qazaqstan oblysynda kún jylynǵaly kene shaqqan 335 adam medıtsınalyq kómekke júgindi.
Kóktemniń erte shyǵýyna baılanysty bıyl óńirde zııankesten zardap shekkender sany artqan. Tek sáýir aıynda 200-ge jýyq adamdy kene shaqsa, byltyr osy aralyqta 138 adam dárigerge qaralǵan.
SQO sanıtarııalyq-epıdemıologııalyq baqylaý departamentiniń málimetinshe, kene shaǵý derekteriniń jıileýine tabıǵat aıasyna demalýǵa shyǵýshylardyń kóbeıýi sebep. Osyǵan baılanysty mamandar turǵyndardy saqtyq sharalaryn qatań ustanýǵa shaqyrady.
— Búginge deıin medıtsınalyq kómekke júgingenderdiń 91-i 14 jasqa deıingi balalar. Degenmen, ázirge kene entsefalıti aýrýy anyqtalǵan joq. Bul óńirdegi epıdemıologııalyq jaǵdaıdyń turaqty ekenin kórsetedi, — deıdi sanıtar dárigerler.
Mamandardyń aıtýynsha, kene entsefalıti — kene shaǵýy arqyly taralatyn qaýipti vırýstyq aýrý. Ol adamnyń mıy men julynyn zaqymdap, aýyr asqynýlarǵa ákelýi múmkin. Sondyqtan aldyn alý sharalaryn saqtaý asa mańyzdy.
— Sonyń biri — vaktsınatsııa, ol kene entsefalıtinen qorǵanýdyń eń senimdi joly. Alaıda ekpeni aldyn ala josparlap alǵan jón. Tabıǵatqa shyqqanda jabyq, ashyq tústi, jeńi uzyn kıim kıgen durys.
Repellent sııaqty kenege qarsy arnaıy qorǵanys quraldaryn qoldaný da mańyzdy. Tabıǵat aıasyna shyqqanda kene baryn esten shyǵarmaǵan jón, ıaǵnı, bıik shóptiń arasyna kirmeı, ózińizdi jáne balalardy jıi tekserip otyrý qajet, — deıdi mamandar.
Buǵan deıin Qazaqstanda Kongo-Qyrym gemorragııalyq qyzbasynyń taralý qaýpi saqtalǵanyn jazǵan edik.
