SQO-da kene entsefalıtiniń bes jaǵdaıy tirkeldi

PETROPAVL. KAZINFORM – Soltústik Qazaqstan oblysynda sáýir aıynyń basynan bastap 408 adamdy kene shaqty. Ótken jyldyń sáıkes kezeńimen salystyrǵanda bul 3 ese kóp. 

SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, epıdemııalyq maýsym bastalǵannan beri oblysta kene entsefalıtiniń 5 jaǵdaıy tirkeldi, Petropavlda – 3, Qyzyljar aýdanynda 2 adam aýyrǵan. 

– Keneler – kene entsefalıti, kene súzegi, kene borrelıozy (Laım aýrýy), gemorragııalyq qyzba jáne t.b. kóptegen juqpaly aýrýlardyń qozdyrǵyshtary retinde qaýipti. Eń qaýiptilerdiń biri – kene vırýstyq entsefalıti. Kene entsefalıti – ortalyq júıke júıesiniń basym bóligin zaqymdaıtyn jiti ınfektsııalyq aýrý. Aýrýdyń saldarynan adam múgedek bolyp qalýy, tipti ajal qushýy múmkin, - deıdi sanıtar dárigerler.

Kene entsefalıtiniń vırýsy adamǵa negizinen ıksod keneler shaqqanda beriledi. Keneni ezgende nemese tistegen jerlerdi tyrnaǵanda da aýrý paıda bolýy múmkin.
Qyzmeti kene entsefalıtiniń tabıǵı oshaǵynda bolýymen baılanysty adamdar profılaktıkalyq ımmýndaýdan ótedi. 

Memlekettik tapsyrys aıasynda sáýir aıynda Aıyrtaý aýdanynyń Aıyrtaý jáne Lobanovo aýyldarynda kenege qarsy dezınsektsııalyq is-sharalar ótkizildi, sondaı-aq osy jyldyń qyrkúıeginde bul jumys qaıtalanady. 

Buǵan deıin Petropavlda kene men masaǵa qarsy dárileý jumystary júrip jatqanyn jazǵan edik.